Информатика ўқитувчилари учун сертификатлаш миллий тизими жорий этилади

Вазирлар Маҳкамасининг “Информатика ва ахборот технологиялари фани” ўқитувчиларининг рақамли технологиялардан фойдаланиш кўникмаларини аниқлаш бўйича сертификатлаш миллий тизимини жорий этиш тўғрисида”ги қарори лойиҳаси эълон қилинди.

Қарор лойиҳаси Вазирлар Маҳкамаси ҳузуридаги Давлат тест маркази томонидан ишлаб чиқилган.

Мазкур қарор лойиҳасида умумтаълим мактабларининг “Информатика ва ахборот технологиялари фани” ўқитувчиларининг рақамли технологиялардан фойдаланиш кўникмаларини аниқлаш ва сертификат бериш тартиби белгиланмоқда.

Лойиҳа иловаси билан ўқитувчиларнинг рақамли технологиялардан фойдаланиш кўникмаларини эгаллаш даражаси бўйича сертификат 3 йил муддатга берилиши ва сертификатга эга бўлган ихтисослаштирилган мактабларнинг “Информатика ва ахборот технологиялари фани” ўқитувчиларига базавий тариф ставкаси бўйича фоиз миқдорида ҳар ойлик устама жорий этилиши назарда тутилмоқда.

Унда, биринчи босқич натижаси бўйича энг юқори баллнинг камида 70 фоизини тўплаган ўқитувчиларни иккинчи босқичга тавсия этиш ва иккинчи босқич натижалари бўйича энг юқори баллнинг:

• 40-49 фоизини тўплаган ўқитувчиларга 10 фоиз миқдорида;
• 50-59 фоизини тўплаган ўқитувчиларга 20 фоиз миқдорида;
• 60-69 фоизини тўплаган ўқитувчиларга 30 фоиз миқдорида;
• 70-79 фоизини тўплаган ўқитувчиларга 40 фоиз миқдорида;
• 80-100 фоизини тўплаган ўқитувчиларга 50 фоиз миқдорида устама жорий этиш назарда тутилган.

Шунингдек, ўқитувчиларнинг рақамли технологиялардан фойдаланиш (назарий ва амалий) кўникмаларини аниқлаш учун топшириқлар формати (фан мазмуни таркиби, саволлар сони, топшириқлар тури, вақт меъёри), баҳолаш мезонлари Ахборот технологиялари ва коммуникацияларини ривожлантириш вазирлиги томонидан тавсия этилган профессор-ўқитувчилар томонидан ишлаб чиқилиши, Давлат тест маркази томонидан тасдиқланиши ва сайтига жойлаштирилиши белгиланган.

Билдирилишича, “Информатика ва ахборот технологиялари фани” ўқитувчиларининг рақамли кўникмаларни эгаллаш даражасини аниқлаш бўйича миллий тизим жорий этилиб, назарий ва амалий синовларни компьютер (онлайн платформа)да ўтказиш имконияти яратилади.

Рақамли технологиялардан фойдаланиш кўникмаларини аниқлаш бўйича ўтказиладиган назарий ва амалий синовлар учун ўқитувчидан ариза берилган кундаги базавий ҳисоблаш миқдорининг бир ярим баравари миқдорида тўлов ундирилади.