Оммавий тест ва қатъий карантин чоралари туфайли Ветнамда касаллик юқтириш билан боғлиқ атиги 1851та ҳолат ва 35та ўлим қайд этилган.
Вируснинг "британча" штамми Ветнамнинг 10 провинцияси ва шаҳарларида коронавирус тарқалиши авж олишига сабаб бўлди. Бу ҳақда мамлакат соғлиқни сақлаш вазири Нгуен Тхан Лонг маълум қилди.
"Генетик тадқиқотлар 276 беморнинг 12 нафари Бирлашган Қиролликда аниқланган штамм билан зарарланганини кўрсатди, касаллик манбаи номаълум бўлиб қолмоқда", - дея унинг сўзларидан иқтибос келтирмоқда Сингапурнинг Channel News Asia телеканали.
Вазирнинг қайд этишича, Ҳайзионг провинциясида вирус аниқланганидан олти кун ўтиб касаллик ўчоғини назоратга олишга муваффақ бўлинган, аммо 20та ҳолат қайд этилган Ҳанойда вазият изига тушиши учун кўпроқ вақт талаб қилинади. У Ҳанойда кунига 40 мингтагача тест олиш режалаштирилганини айтди.
Channel News Asia телеканалининг эслатишича, оммавий тест ва қатъий карантин чоралари туфайли Ветнамда касаллик юқтириш билан боғлиқ атиги 1851та ҳолат ва 35та ўлим қайд этилган.
Ўтган ҳафтада мамлакат ҳукумати AstraZeneca компанияси вакцинасидан фойдаланишни маъқуллади. Аввалроқ ҳукумат 30 млн доза вакцина сотиб олиш бўйича музокара олиб борилаётганини маълум қилганди.
