Янгиқўрғонда картошкага ихтисослаштирилган томорқа кластери ташкил этилади

Вилоят фермерлар кенгашидан Kun.uz'га маълум қилишларича, лойиҳа қиймати – 4,6 млрд сўм.

Бу маблағларга Нидерландиядан 525 тонна, шундан Фермерлар кенгаши ҳузуридаги жамғарма ҳисобидан ажратилган 3 млрд сўмлик маблағ эвазига 325 тонна, аҳолининг 1,8 млрд сўмлик маблағлари ҳисобидан 200 тонна супер элита картошка уруғлари олиб келинган.

Картошкачилик тажрибасига эга 3780 та хонадондаги 150 гектар майдонда жами 525 тонна 8 хил навли (шундан «Санте» 85 тонна, «Силвана» 10 тонна, «Примабелла» 60 тонна, «Сагита» 21,2 тонна, «Лизетта» 59,5 тонна, «Констанса» 105 тонна, «Арнова» 138 тонна, «Лусинда» 46 тонна) юқори репродукцияли картошка уруғлари экилиб, 5250 тонна биринчи авлодли картошка уруғлиги етиштирилган.

Ҳисоб-китобларга кўра, етиштирилган уруғлик 75 минг хонадоннинг 1540 гектар майдонига етади, келгусида 46,2 минг тонна картошка етиштирилади.

Сифатли картошка уруғлиги экилиши ҳисобига вилоятда қўшимча 30 та МФЙ 101 мингта хонадонда «Бир маҳалла – бир маҳсулот» тамойили асосида картошка экилиши тизимига ўтади.

Сифатли картошка уруғи етказиб бериш, белгиланган агротехник тадбирларни амалга ошириш, соҳага илғор тажрибаларни жорий этиш, провардида вилоятда картошка уруғчилик базасини яратиш мақсадида Томорқа хизмати корхонаси негизида «Картошкачилик» томорқа кластери ташкил этиш режалаштирилган.