5-синфдан 11-синфгача ягона синф раҳбари тайинланади

5-синфдан бошлаб 11-синфга қадар ягона синф раҳбарини тайинлаш бўйича Низом жорий этилди. Янги Низомга кўра, 5-синфдан бошлаб 11-синфга қадар ягона синф раҳбари тайинлаш йўлга қўйилади ва барча мактабларда синф раҳбарлари қуйидаги умумий талабларга жавоб бериши лозим:

• камида 3 йиллик педагогик иш стажига эга бўлиши;
• мактабда тўлиқ ставкада аосий ишчи сифатида фаолият юритиши;
• бўлиниб ўқитиладиган фанлардан дарс бермаслиги;
• одоб-ахлоқи ва хулқи билан ўқувчиларга шахсий намуна бўла олиши;
• руҳий жиҳатдан барқарор бўлиши;
• ўқувчилар билан ишлаш жараёнига масъулият билан ёндаша олиши.

Шунингдек, қабул қилинган янги низомга мувофиқ, синф раҳбарларининг:

• амалдаги ҳужжатлари сони оптималлаштирилди;
• фаолиятини баҳолаш мезонлари яратилди;
• малака ошириш курслари ишлаб чиқилди;
• ота-оналар билан ишлаш тизими такомиллаштирилди.

Вазирлик матбуот котиби Лайло Рустамова Kun.uz мухбирига маълум қилишича, синф раҳбари оилавий шароитига ёки бошқа сабабларга кўра иш жойини ўзгартирган ҳолатларда мактаб директори томонидан у раҳбарлик қилаётган синфга бошқа синф раҳбари тайинланади.

«Агар ота-оналар томонидан синф раҳбарининг фаолиятига эътирозлар мавжуд бўлса, синф ўқувчиларининг ота-оналари мактаб директори номига сабабларни маълум қилган ҳолда мурожаат қилишади. Директор ота-оналарнинг мурожаатида келтирилган маълумот ва реал вазиятга баҳо берган ҳолда синф раҳбари билан суҳбатлашади, борди-ю вазият барқарорлашмаса, у раҳбарлик қилаётган синфга белгиланган мезонлар асосида бошқа синф раҳбарини тайинлайди», дейди Лайло Рустамова.

Қайд этилишича, амалга оширилаётган ушбу ўзгаришлардан кутилаётган асосий натижалар:

- синф раҳбарларининг ўқувчилар тарбиясига таъсири сезиларли равишда ошиши;

- 5-синфдан 11-синфгача ягона синф раҳбарининг бириктирилиши натижасида синфдаги ижтимоий муҳитни соғлом равишда ушлаб туриш имкони;

- ота-оналар томонидан ўз фарзандларини таълим-тарбия жараёнига нисбатан қизиқишининг ортишидир.