Қўшимча функционаллар
-
Тунги кўриниш
Николя Саркози коррупцияда айбланиб қамоқ жазосига ҳукм қилинди
Франция собиқ президенти Николя Саркози коррупция ва судьяларни сотиб олишда айбдор деб топилди. Франция суди уни 3 йил қамоққа ҳукм қилди. Собиқ президент белгиланган муддатнинг 2 йилини шартли равишда ўтайди.
Маҳаллий ОАВнинг ёзишича, Саркози катта эҳтимол билан қамоқда ётмайди. Чунки француз қонунчилигига кўра, икки йилдан кам қамалиши керак бўлганлар қўлида уни текширишга имкон берувчи билагузук таққан ҳолда озодликда бўлиши мумкин. Худди шундай жазо ҳукми собиқ президентнинг адвокати Тьерри Эрцогга ҳам қўлланганди.
Саркози ўзига нисбатан қўйилган барча айбловларни рад этиб келади. Суд эса собиқ президент қилаётган ишлари қонунбузарлик эканини билган, деб топган.
Саркози Франция президентлари орасида суд қилинган биринчиси эмас. Унинг сиёсат пиллапоясида юқорилашига ёрдам берган Жак Ширак ҳам судланган, бироқ 2011 йил саломатлиги сабаб судда иштирок этмаган. Унга икки йил шартли қамоқ жазоси берилган.
Саркози нимада айбланмоқда?
Терговчилар ишнинг бошида Саркозининг 2007 ва 2012 йилги сайловолди кампаниясининг молиялаштирилишини текширишди. Саркози бу кампания давомида миллиардер Лиллиан Бетанкур ва ҳатто Ливия инқилоби етакчиси Муаммар Қаззофийдан пул олгани айтилади. Айбловга кўра, Саркози ўз сайлов кампаниясига Лиллиан Бетанкур томонидан пул ажратилгани бўйича ишни ўрганаётган судьяга лавозими кўтарилишини ва Монакодан уй таклиф қилган. Айбловга исбот сифатида Саркози ва адвокатининг телефон суҳбати келтирилган.
Шунингдек, Саркози охирги ишида алоқаси бўлмаган яна бир шов-шувли ишда қатнашгани айтилади. Унга кўра, Саркози кейинчалик Франциянинг «ПСЖ» клубини молиялаштириш шарти билан қатарликларга 2022 йилги футбол бўйича жаҳон чемпионати мезбонлигини олиб беришда иштирок этишда гумонланади.
