Тошкентда барчага йил охирига қадар «ақлли» газ ҳисоблагичлар ўрнатилади

Қайд этилишича, 16 март куни Тошкент шаҳар “Ҳудудгаз Пойтахт” газ таъминоти филиали томонидан матбуот анжумани ўтказилди. Анжуманда табиий газ етказиб беришни назорат қилишнинг автоматлаштирилган тизими жорий этилаётгани, бу бўйича аҳоли ўртасида юзага келаётган саволлар, улар орқали муаммоларни ўрганиш ва ҳал этиш бўйича қилинаётган ишлар атрофлича таҳлил этилди. 

Маълум қилинишича, пойтахтда газ истеъмолчилари жами 629 427та бўлиб, шулардан 448 073тасини кўп қаватли, 181 354тасини эса ерли аҳоли хонадонлари ташкил этади. 

“Қайд этиш керакки, йил охирига қадар замонавий “ақлли” газ ҳисоблагичлар барчага ўрнатилиши кўзда тутилган. Мазкур ҳисоблагичларни ўрнатиш аҳоли учун бепул ҳисобланиб, ташкилот томонидан 5 йиллик бепул сервис хизмати ҳам кафолатланади”, дейилади маълумотда. 

Анжуманда табиий газ истеъмолчиларига қулайлик яратиш мақсадида (55) 503-28-28 рақами бўйича “Call-марказ” ишга тушгани эълон қилинди. Бундан ташқари, соҳадаги қонунбузилиш ва коррупция ҳолатлари бўйича (55) 503-90-17 рақамли “Ишонч телефони” йўлга қўйилгани, бунга истеъмолчилар ўз мурожаатларини қолдириши мумкинлиги айтилди.