Навоийда Туркия билан ҳамкорликдаги тикувчилик корхонаси иш бошлади

Навбаҳор туманида «Mengi Tekstil group» енгил саноат тикувчилик корхонаси очилди. Ушбу корхонада ишлаб чиқарилган трикотаж маҳсулотлари асосан экспорт қилиниши ва ички бозорларга йўналтирилиши режалаштирилган.

Туман ҳокимлиги матбуот хизматининг Kun.uz'га маълум қилишича, Туркия давлатининг «Mengi Tekstil group» МЧЖ томонидан ташкил этилган ушбу лойиҳанинг умумий қиймати 5,5 миллиард сўмга тенг. Яратилган 400 та янги иш ўринларига тумандаги ишсиз фуқаролар, «Аёллар дафтари» ва «Ёшлар дафтари»га киритилган хотин-қизлар қабул қилинган.

Лойиҳанинг қурилиш ишлари 2020 йилнинг март ойида бошланган эди. Бугунги кунда қурилиш ва монтаж ишлари тўлиқ якунланган ҳамда корхонага 175 та тикув машинаси, 20 та дазмолловчи, 3 та ранг босувчи ҳамда 2 та қадоқловчи дастгоҳ келтириб ўрнатилган.