Сингапурда имо-ишора билан очиладиган эшик ишлаб чиқилди (видео)

Сингапурнинг STUCK Design компанияси қўл билан тегмасдан, имо-ишора билангина очиш мумкин бўлган ён томонга сурилувчи эшик ишлаб чиқди. Ҳозирда кенг қўлланувчи ҳаракат датчикларига эга эшиклардан фарқли, ушбу эшик фақатгина қўл имо-ишорасига таъсирланади. 

Ушбу эшикнинг ишлаши акс этган видеода ойнаванд эшикка ўрнатилган дисплейли бошқарув блокини кўриш мумкин. Блок имо-ишорани кузатиш учун мўлжалланган. Блок кутиш режимида бўлганда унинг экранида ингичка рамка акс этиб туради. Агар қўл блокка 40 смгача яқинлаштирилса, унда рамка ҳаракатга келиб, унга кафт яқинлашгани сари қалинлашиб боради. Рамка бутун экранни қоплаганда, унинг ранги ўзгариб, эшик сигнал товуши чиқаради. Шундан кейин уни қўл теккизмасдан чапга ёки ўнгга суриш мумкин бўлади. Агар қўл датчикдан олинса, унда эшик ёпилади.

Таъкидланишича, бундай эшик ҳозирги пандемия шароитида айниқса асқатиши мумкин.