Шимолий Корея қаторасига иккинчи кун ракета синовларини ўтказди  

Шимолий Корея 26 март куни иккита тактик ракетаси синовини ўтказди. Бу Пхеняннинг 2 кун ичидаги иккинчи ракета синовидир. Бу ҳақда Шимолий Кореянинг Rodong Sinmun расмий нашри маълум қилди. 

Нашрда яқинда ишлаб чиқилган ракеталар Япон денгизи устидан 600 км учиб ўтгани маълум қилинган. Маълумотларга кўра, ракеталар 2,5 тоннагача оғирликдаги жанговар каллакни таший олади. Таъкидланишича, синовларни Шимолий Корея етакчиси Ким Чен Ин кузатмаган.  

25 март куни жанубий кореялик ҳарбийлар Пхенян Япон денгизи томон кичик масофаларга мўлжалланган 2та баллистик ракета учирганини маълум қилганди. Ракеталар 60 км баландликда 450 кмга яқин масофани учиб ўтган. 

Бундан ташқари, Шимолий Корея 21 март куни ҳам қанотли ракеталари синовини ўтказганди. Баллистик ракеталардан фарқли, қанотли ракеталар БМТ Хавфсизлик кенгаши санкциялари остига тушмайди.

Таҳлилчилар ушбу синовларни Шимолий Корея етакчиси Ким Чен Иннинг АҚШнинг янги президенти Жо Байденга чақириқ ташлаши деб баҳолашмоқда.

Ўз навбатида Байден вазият кескинлашгудек бўлса, Вашингтон Пхеняннинг ушбу ҳаракатларини жавобсиз қолдирмаслигини айтган.