Маск Марсга парвоз қиладиган одамлар ўлимга тайёр туришлари кераклигини айтди

Маск 2050 йилга бориб Марсга бир миллион кишини жўнатишни режалаштирган.

Америкалик тадбиркор, Tesla ва SpaceX компаниялари асосчиси Илон Маск Марсга парвоз қиладиганлар ҳалок бўлиши мумкин, деб ҳисобламоқда. Бу ҳақда Daily Mail хабар берди.

Маск X Prize Foundation техник хайрия ташкилоти асосчиси Питер Диамандис билан суҳбатида ана шундай огоҳлантириш билан чиқди.

"Марсга саёҳат – Антарктикага йўл олган Шеклтоннинг рекламаси билан бир хил. Бунинг хавфли, ноқулай ва узоқ эканлигини биласиз. Балки сиз тирик қайтмаслигингиз мумкин, аммо бу қойилмақом саргузашт бўлади. Ростини айтганда, ўлишингиз мумкин ва эҳтимол, сизда яхши таом ва бошқа нарсалар бўлмаслиги мумкин", - деди у.

Маск 2026 йилга бориб Марсга одамларни жўнатмоқчи эканлигини айтганди.

У 2050 йилга бориб Марсга бир миллион кишини жўнатишни режалаштирган. Унинг фикрича, одамлар Starship SpaceX ракетасида Марсга икки йилда етиб боришлари мумкин.