Жиноят ишлари бўйича Тошкент тумани суди туман прокурори A.Назаровнинг илтимосномасини қаноатлантириб, Саида Ҳошимовага нисбатан уй қамоғи эҳтиёт чораси қўллаш тўғрисида ажрим чиқарди.
Тошкент вилояти прокуратураси Тошкент туманидаги 26-мактаб директори 173 млн сўм бюджет маблағини талон-торож қилганликда гумонланаётгани ҳақида 16 апрел куни хабар тарқатган эди.
Бу хабардан тушкунликка тушган мактаб директори Kun.uz'га мурожаат қилиб, жиноятчи эмаслигини, 173 миллион сўмни талон-торож қилмаганини, маҳалла, ҳокимлик ва прокуратура босим қилиб, унга қарши бирлашиб иш кўраётганини айтганди.
Kun.uz'га маълум бўлишича, Саида Ҳошимова жиноят ишлари бўйича Тошкент тумани судининг 21 апрелдаги ажрими билан лавозимидан четлатилган.
Шунингдек, жорий йил 30 апрел куни шу суд туман прокурори A.Назаров киритган илтимосномани қаноатлантириб, Саида Ҳошимовага нисбатан уй қамоғи эҳтиёт чорасини қўллаш тўғрисида ажрим чиқарган.
Бу – прокуратура органларининг аёлларга, хусусан, жамиятда ардоқланиши ва иззат-икром кўрсатилиши лозим бўлган касб эгаларига нисбатан кескин чоралар кўришига оид илк ҳолат эмас.
COVID-19 ўчоғи ичида ишлаган шифокорлар ва оғир аҳволдаги беморлар учун шароит талаб қилган шифокор Гулжаҳон Йўлдошева ҳам жамоатчиликка мурожаат йўллаганидан кўп ўтмай қамоққа олинган эди.
Кейинчалик, Масс-медиа фонди раиси ўринбосари Саида Мирзиёева Тошкент вилояти прокуратурасидан шифокор Гулжаҳон Йўлдошевага оид қарорни қайта кўриб чиқишни сўраганди. Олий Мажлис Сенати ва кенг жамоатчиликнинг эътирозларидан сўнг унинг эҳтиёт чораси уй қамоғига ўзгартирилган эди.
Сўнгги вақтларда тенденция шуни кўрсатмоқдаки (жамоатчиликка маълум бўлган ҳолатларга кўра), прокуратура органлари майда маиший ишларда, айниқса ожиз жинс вакиллари билан боғлиқ жиноятларни тергов қилишда анча «жонбозлик» кўрсатмоқда. Аммо жиддийроқ масалаларга рўпара келганларида олди-қочди, ёлғон-яшиқ гаплар билан, ишни юмалоқ ёстиқ қилиб ёпиб юбораётгани яшириб бўлмайдиган айни ҳақиқатдир.
Масалан, 6 нафар фуқаронинг ўлимига сабаб бўлган Юнусобод метроси қурилишидаги фожиа юзасидан тергов ишини олайлик. «Етказилган зарар тўлиқ қопланди», дея ҳеч бир одамга чора кўрилмасдан жиноят иши тугатиб юборилди. Ваҳоланки, бу вақтда жабрланувчиларга етказилган зарар тўлиқ қопланмагани Kun.uz суриштирувидан сўнг аниқланди.
Бу орқали Гулжаҳон Йўлдошева ёки Саида Ҳошимоваларни оқлаш фикридан мутлақо йироқмиз. Ҳар ким қилмишига яраша жазосини олиши шарт. Аммо ҳуқуқ посбонлари барча ишда бирдек адолат ва қонунийликни таъминламас эканлар, халқнинг уларга бўлган ишончи камайса камаядики, асло ортмайди.
