Saida Mirziyoyeva Toshkent viloyati prokuraturasidan shifokor Guljahon Yo‘ldoshevaga oid qarorni qayta ko‘rib chiqishni so‘radi

Milliy mass-mediani qo‘llab-quvvatlash va rivojlantirish jamoat fondi vasiylik kengashi raisi o‘rinbosari Saida Mirziyoyeva O‘zbekistonda so‘nggi vaqtlarda muhokamalar markazida bo‘lib turgan Toshkent viloyati yuqumli kasalliklari shifoxonasi bosh shifokori – Toshkent viloyati bosh infeksionisti Guljahon Yo‘ldoshevaga oid voqeaga munosabat bildirdi.

U Toshkent viloyati yuqumli kasalliklari shifoxonasi bosh shifokori - viloyat bosh infeksionisti Guljahon Yo‘ldoshevaning qamoqqa olinishi bilan bog‘liq holatga to‘xtalgan.

«Men uchun, ham ayol, ham ona va gender tengligi komissiyasining a'zosi sifatida bu juda muhimdir!», deya qayd etgan Saida Mirziyoyeva.

U Guljahon Yo‘ldosheva birinchi galda ayol kishi ekanligi, qaramog‘ida 6 nafar voyaga yetmagan farzandlari borligini inobatga olgan holda Toshkent viloyati prokuraturasidan qaror qayta ko‘rib chiqilishini so‘ragan.

«Men unga qo‘yilgan ayblovlarning qonuniy yoki noqonuniyligini hech qanday baholamoqchi emasman, bu sudning mutlaq vakolati. Ammo sizning e'tiboringizni shunga qaratmoqchimanki, eng kichigi atigi ikki yoshda bo‘lgan olti farzandning onasi sudgacha qamoqda saqlanmoqda. Bizning qonunchiligimiz, boshqa rivojlangan mamlakatlar qonunchiligi singari, erkaklarga qaraganda ayollar uchun biroz ko‘proq imtiyozlarni o‘z ichiga oladi. Bunga misol sifatida ayol kishining homiladorligi yoki voyaga yetmagan farzandlari borligi unga yengillashtiruvchi holatlar taqdim etishi mumkin. Bu ham insonparvarlikning bir turi. 

Guljahonning ishida nega qonun bu qadar qattiq va qat'iy? Olti bola bilan qayergadir qochib qutilishi mumkinmi? Nahotki sudgacha qamoqda saqlash bizning huquqni muhofaza qilish organlari xodimlarining yagona yo‘li bo‘lsa? Jinoyat-protsessual qonunchiligida boshqa ta'sirchan ehtiyot choralarini qo‘llashga nima xalaqit beradi?

Hibsga olish — bu kuchli stress va shaxsning ma'nan sindirilishidir. Ayniqsa, uyda yosh bolalaringiz bo‘lganida... Shuning uchun Toshkent viloyati prokuraturasidan qarorni qayta ko‘rib chiqishni so‘rab qolaman», degan u.

Avvalroq Tanzila Norboyeva Toshkent viloyati bosh infeksionistiga qo‘llanilgan ehtiyot chorasiga munosabat bildirib, «Og‘ir jinoyat qilganlar ham chetga chiqib ketmaslik sharti bilan uyda saqlanadi — bolasining oldida, oilasida bo‘ladi. Shu nuqtai nazardan, uning jinoyati qanchalik og‘ir yoki og‘ir emasligiga hozir baho bera olmayman, lekin ayol kishi, kichkina bolasi borligini e'tiborga olib, hozircha qamoqqa olmaslik ham mumkin edi, qachonki sud qaror chiqarmagunicha», degandi.

Shuningdek, Senatning sud-huquq masalalari va korrupsiyaga qarshi kurashish qo‘mitasi raisi Botir Matmuratov Guljahon Yo‘ldoshevaga qo‘llangan ehtiyot chorasi o‘zgartirilishi kerakligini aytgan.