Сербияда коронавирусга қарши эмланганларга пул тўланади

Мамлакат президентининг қўшимча қилишича, эмлангандан сўнг "кимнингдир айби билан" коронавирус юқтирганларга пул тўланадиган таътил берилади, эмланмаганларга эса касаллик даври учун пул тўланмайди.

Фото: AFP

Сербия ҳукумати 31 майгача коронавирусга қарши вакцинанинг камида бир дозасини қабул қилган 16 ёшдан ошган фуқароларга 3000 динордан (30 доллар) пул бериш тўғрисида қарор қабул қилди. Бу ҳақда мамлакат президенти Александр Вучич маълум қилди, деб хабар бермоқда 021.rs.

"Вакцина олмаганларга чора кўра олмаймиз, шу сабабли эмланганларни мукофотлашни ўйлаяпмиз", – деди у.

Вучичнинг қўшимча қилишича, эмлангандан сўнг "кимнингдир айби билан" коронавирус юқтирганларга пул тўланадиган таътил берилади, эмланмаганларга эса касаллик даври учун пул тўланмайди.

У бундай чоралар сербларни вакцина билан эмланишга рағбатлантиришига умид билдирди. Вучич шунингдек, эмланган ходимларига қўшимча пул бераётган компанияларни мақтади.

Вучичнинг ўзи апрел бошларида Хитойнинг Sinopharm компанияси вакцинаси билан эмланганди. Сербияда шунингдек, BioNTech / Pfizer, AstraZeneca ва Sputnik V вакциналаридан фойдаланилмоқда.

Тайёрлаган Дилшод Аскаров

#Сербия #вакцина

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.