Инновация вазирлиги Германия билан ҳамкорликда янги лойиҳа амалга оширади

Инновация вазирлиги Германия билан ҳамкорликда «Замонавий инновацион марказлар – 2022» техник ёрдам лойиҳасини бошлади. Бу ҳақда Kun.uz’га вазирлик ахборот хизмати хабар берди.

10 май куни Инновацион ривожланиш вазири Иброҳим Абдураҳмонов ҳамда Германия халқаро ҳамкорлик жамияти (GIZ) директори Йорг Пуделка томонидан 250 минг Евро қийматидаги «Замонавий инновацион марказлар – 2022» техник ёрдам лойиҳасини амалга ошириш тўғрисида Меморандум имзоланди.

Лойиҳа 3 та асосий компонентдан иборат бўлиб, у илғор Германия тажрибасига таянган ҳолда инновацион марказлар ходимлари ва инновацион тизимнинг асосий иштирокчиларининг стажировкаларини ташкил этиш, аҳолининг инновациялар тўғрисида хабардорлигини оширишни ўз ичига олади.

Меморандум доирасида Халқаро ҳамкорлик бўйича Германия жамиятининг (GIZ) беғараз грантлари асосида 15 нафар инновация соҳасидаги мутахассислар Германияга малака оширишга юборилади, халқаро экспертлар ёрдамида «Инновацион марказларни бошқариш тўғрисида»ги қўлланма ишлаб чиқилади ҳамда Германиянинг инновация соҳаси тўғрисидаги лицензияланган ҳужжатли фильмлар мамлакат телерадиоканаллари орқали кенг жамоатчиликка тақдим этилади.

Инновацион ривожланиш вазири Иброҳим Абдураҳмоновнинг қайд этишича, республика ҳудудларида инновацион инфратузилмаларни ташкил этилишида кадрлар масаласи, уларнинг малакаси катта аҳамиятга эга. Инновациялар бўйича проректорлар масъуллигидаги илмий ишланмалари тижоратлаштириш марказларига умумий концепция ишлаб чиқиш энг муҳим вазифалардан бири. Ушбу Меморандум шундай инновацион марказларни ривожлантириш, бошқариш соҳасини янги ва юқори поғонага кўтаришда катта туртки бўлиб хизмат қилади.

#Германия #янги лойиҳа #Инновация вазирлиги