Эрдўған коронавирусга қарши учта доза вакцина олгани учун танқидга учради

Туркия президенти Ражаб Тоййиб Эрдўған коронавирусга қарши учта доза вакцина олганини маълум қилгандан кейин танқидга учради. Танқидчиларнинг таъкидлашича, мамлакатда вакциналар етишмаётган бир пайтда Эрдўғаннинг учта доза вакцина олиши нотўғри ҳисобланади.  

Туркия раҳбари мамлакатда биринчилардан бўлиб коронавирусга қарши эмланган. 14 январда унга Хитой Sinovac вакцинасининг биринчи дозаси киритилган. У ушбу вакцинанинг иккинчи дозасини 11 февралда олган. Жорий ҳафтада эса Эрдўған 10 март куни яна бир доза вакцина олгани маълум бўлди. Эрдўған вакцинанинг учинчи дозасини организмидаги антитаналар миқдори ошиши ёки йўқлигини текшириш учун олганини айтган.   

Бироқ Туркия етакчиси учинчи доза Sinovac ёки кейинроқ сотиб олинган Pfizer вакцинаси бўлганига аниқлик киритмаган.

Таъкидланишича, Эрдўған қўшимча дозани олганида Pfizer вакцинасининг биринчи дозасини олиш ҳуқуқига эга бўлганлар мамлакатда ушбу вакцина йўқлиги сабабли бир ой эмас, 12 ҳафта кутишларига тўғри келиши айтилган. 

Туркиядаги асосий мухолиф партиянинг парламентдаги вакили Энгин Ўзкўч «қолганларга битта доза вакцина ҳам бўлмаган кезда, Эрдўғанга учта доза вакцина тақдим қилингани»ни танқид қилган.

Бугунги кунда Туркияда 30 млнга яқин вакцина қўлланган бўлиб, аҳолининг 15 фоиздан зиёди, яъни 12,5 млн киши иккита доза вакцина олиб бўлган. Бунда Туркия иқтисодиётининг сердаромад йўналишларидан бири — туризм соҳаси вакилларига кўпроқ устунлик берилган.

Бироқ қолган муҳим соҳалар вакиллари, жумладан, ўқитувчилар вакцина олиш учун узоқроқ вақт кутишларига тўғри келган. Бундан ташқари, коронавирусга мусбат тест топширганларга 6 ой давомида эмланиш тақиқлаб қўйилган.