Покистон жануби-шарқида икки йўловчи поезд тўқнашиши оқибатида камида 30 киши ҳалок бўлди. Яна ўнлаб кишилар жароҳатланган ҳолда шифохоналарга етказилган.
Маҳаллий расмийларнинг хабар беришича, Карачидан йўлга чиққан поезд Синд провинцияси ҳудудида рельсдан чиқиб кетган ва бошқа йўл устида пайдо бўлган. Равалпиндидан келаётган ва йўловчилар билан тўлиб-тошган иккинчи поезд эса унга тўқнашиб ағдарилиб кетган.
Саккиз вагон пачоқланиб кетган, бу эса ичкарида қолиб кетган одамларга етиб боришни қийинлаштирган. Хабарларга кўра, жами 14 вагон ағдарилган.
Ҳукумат камида 30 киши қурбон бўлган ва яна 50 киши жароҳатлангани ҳақида хабар қилган.
Маҳаллий расмийларга таяниб хабар тарқатган «Блумберг» агентлиги хабарига кўра эса қурбонлар сони 35тани ташкил этмоқда.
Қутқарувчилар яраланганларни яқин атрофдаги шифохоналарга олиб боришган. Уларнинг айримларининг аҳволи ўта оғир.
Geo News телеканали полицияга асосланиб хабар беришича, қутқарувчилар ичида тахминан 25 киши қолиб кетган вагонга етиб боришга ҳаракат қилмоқда.
Покистонда сўнгги йилларда темир йўлларда бир неча ҳалокатли авариялар рўй берган.
Мамлакат бош вазири Имрон Хон твиттердаги саҳифасида поездлар тўқнашувидан шок ҳолатида эканини ёзган. У ҳодиса синчковлик билан текширилишини ваъда қилган.
Авария Готки тумани яқинида рўй берган.
At least 30 passengers have been killed after 2 express trains collided in southern Pakistan.
— Bloomberg Quicktake (@Quicktake) June 7, 2021
Passengers are still trapped in the wreckage of the Millat Express train as authorities arrange heavy machinery to rescue those crying for help https://t.co/VZxwyzSHBF #TrainAccident pic.twitter.com/RXyTUiEEte
Темир йўл ҳалокати юз берган ҳудудда поездлар ҳаракати тўхтатилган.
Покистонда аҳолининг энг кўп қисми, ўрта ва қуйи қатлам вакиллари поездда ҳаракатланишни маъқул кўради. Бутун мамлакат ҳудуди темир йўллар билан қамраб олинган.
