«Энди мутасаддилар ерни аукционга чиқаришга мажбур бўлади» — вазир

{Yii::t(}

Ўтказиб юбориш 6s

Ўтказиб юбориш

«Минг ҳаракат қилсак ҳам инсон омилини тўлиқ йўқотиб бўлмайди. Биз ҳаммамиз инсонмиз-ку, бошқариб борамиз, ўша жараёнларда иштирок этамиз. Инсон омилини 100 фоиз кетказиш учун ҳамма кетиб қолиб, қуруқ ер қолиши керак.

Инсон омилини иложи борича минималлаштириш, кескин камайтириш керак. Аукционларда шу ҳолат юз бериши керак. «Қайси ер аукционга чиқарилади?» деган саволга жавоб беришда инсон омили қолади. Бу ерда инсонсиз иш қилишнинг иложи йўқ, чунки кимдир ерни аукционга чиқариши керак.

Бунинг муаммо бўлган жойлари кўп бўлган, яъни айрим туманларда ер аукционга чиқарилмаган. Нимага? Чунки тўғридан тўғри ажратиш имкони бўлганидан кейин, яхши ерлар ажратиб юборилган. «Ёшлар келажагимиз» дастурига, маҳаллага гузар қуриш учун дейилган… Лекин маҳаллада 1 сотих жойга гузар қуради-да, ёнидаги 20 сотих чиройли жойни берворади. Шу сабабли аукционга ер чиқариш кам бўлган. Ёки ҳеч ким олмайдиган, узоқ жойлардаги ерлар аукционга қўйилган, ётибди олинмасдан…

Масалан, аукционга 26 мингта ер чиқарилган бўлса, 14 мингтаси сотилган. Бундан бизга ҳозирда 270 миллиард сўм пул тушган, жуда катта маблағ. Олдин у ҳам тушмаган. Бу 2020 йил 1 январдан бери тушган пуллар, ёмон эмас бу рақамлар.

Бизнинг тахминга кўра, энди истиснолар қолмагач, мутасаддилар ерни аукционга чиқаришга мажбур бўлади. Чунки қани ривожланиш, қани ишчи ўрни, сервис ва тадбиркорлар деган талаблар бўляпти. Аукционга инсон омили билан ер танлаб чиқарилганидан кейин қолган ишларнинг барчаси 100 фоиз автоматик равишда амалга ошади.

Аукционда иштирок этиш ҳам, ҳужжатни расмийлаштириш ҳам автоматик бўлади. Ҳоким ер ажратиш бўйича қарор чиқармайди, аукцион натижасидаги баённома асосида Кадастр агентлиги автоматик равишда ерни рўйхатдан ўтказади», – дейди Давлетов.

Кадастр агентлиги директори Фазлиддин Умаровнинг қўшимча қилишича, янги ишлаб чиқилаётган илова орқали энди барча фуқаролар томонидан бўш турган ерларни аукционга қўйиш таклифи берилиши мумкин бўлади.

«Таклифни кўпайтириш мақсадида, биз ерларнинг аукционга чиқарилишини таҳлил қилиб кўрдик. 10 мингга яқин маҳаллаларни «қизил», «сариқ» ва «яшил»га бўлиб олдик. 50 фоиз маҳаллаларда таклиф бўлмаган, яъни ер аукционга чиқмаган.

Ҳозир маҳаллалардаги 15 мингга яқин аукционга чиқмаган ерлар бўйича захира яратилди. Албатта, бу ерларни аукционга чиқаришда вазирлик ва ҳудудий ташкилотлар билан келишув жараёни бор. Бу келишувдан кейин, ҳар ойнинг 5- ва 20-саналарида ер майдонлари аукционга қўйилади. Бу ишимизнинг натижаларини шу ойдан кўрсак бўлади.

Ҳозир бирор бўш ерни аукционга чиқариш мумкинлиги ёки йўқлиги ҳақида маълумот йўқ. Бу борада бизга 1 сентябрга қадар мобил илова қилиш вазифаси қўйилган. Ҳозир мутахассисларни жалб қилиб, мобил дастурни ишлаб чиқиш жараёнидамиз.

Илова орқали тадбиркор ўзи кўрган бирор ерни танлаб, унинг локациясини юборади. Бу маълумот Давлат кадастрлар палатасининг базасига келиб тушади. У база орқали бу ер кимгадир тегишли ёки тегишли эмаслиги, ҳимоя зонасими ёки ундай эмаслиги ҳақидаги маълумотлар сўровчига юборилади. Агар ер майдони бўш турган бўлса, у ер бўш турган ер сифатида ҳисобга олиниб, аукционга чиқариш жараёни бошланади.

Аукционга чиққач, барча хоҳловчилар унда шаффоф тарзда қатнашиб, ерни сотиб олишлари мумкин бўлади», – дея Кадастр агентлиги директорининг сўзларини келтирмоқда Kun.uz мухбири.