Туркиядан помидор ва қалампир уруғлари импортига талаблар кучайтирилди

Туркиянинг Бурса ҳудудидан олиб келинадиган помидор ва қалампир уруғлари учун Ўзбекистон Республикаси томонидан вақтинчалик тақиқ ўрнатилди.

«Ўздавкарантин» инспекцияси томонидан Туркиянинг ўсимликлар карантини ва ҳимояси бўйича ваколатли органига Бурса ҳудудидан олиб келинадиган помидор ва қалампир уруғлари учун вақтинчалик тақиқ ўрнатилгани ҳақида хабар қилингач, Туркия қишлоқ ва ўрмон хўжалиги вазирлиги «Ўздавкарантин» инспекцияси сўровига мувофиқ Европа ва Ўрта Ер денгизи ўсимликлар карантини ва ҳимояси ташкилотининг РМ-5/8 стандартига асосан фитосанитар тоза помидор ва қалампир уруғлари етиштираётган корхоналар ҳамда уларнинг манзиллари рўйхатини тақдим этди.

Шунингдек, Туркия қишлоқ ва ўрмон хўжалиги вазирлиги мазкур давлатдан помидор ва қалампир уруғларини экспорт учун юклаш жараёнида Ўзбекистон томонидан қўйилган фитосанитар талаблар асосида ишлар ташкил этилишини маълум қилди.

Шунга асосан, Туркиядан Ўзбекистон ҳудудига олиб кирилиши режалаштирилаётган помидор ва қалампир уруғлари импортида «Ўздавкарантин» инспекцияси томонидан қуйидаги қатъий чора-тадбирлар кўрилади:

помидор ва қалампир уруғлари учун импорт карантин рухсатномасини расмийлаштириш жараёнида рўйхатдаги корхоналар ва уларнинг ишлаб чиқариш манзилларига қатъий эътибор қаратиш;
помидор ва қалампир уруғларини импорт қилиш жараёнининг божхона расмийлаштируви давомида импорт карантин рухсатномасида қайд этилган кўрсаткичлар ва бошқа фитосанитар талаблар бўйича назорат чораларини кучайтириш;
фитосанитар талаблар асосида помидор ва қалампир уруғларини лаборатория экспертизасидан ўтказиш.

«Туркия давлатидан Ўзбекистон Республикасига помидор ва қалампир уруғларини импорт қилишни режалаштиришдан олдин юқорида келтирилган маълумотлар билан танишиб чиқишингиз тавсия этилади. Шу билан бир қаторда, экиш материаллари, кўчат ҳамда уруғликларни республикамиз ҳудудига олиб келиш жараёнида Ўсимликлар карантини давлат инспекциясини олдиндан хабардор қилишингиз мақсадга мувофиқ. Чунки импорт жараёнида белгиланган талабларга риоя этилмаса, маҳсулотлар чегара назорат пунктларидан ортга қайтарилиши мумкин», дейилади «Ўздавкарантин» инспекцияси ахборот хизмати хабарида.

#помидор #қалампир #Ўздавкарантин