Англияда автобус бекатида мудофаа вазирлигининг махфий ҳужжатлари топилди

Англиянинг Кент графлигидаги автобус бекатида ўткинчи одам томонидан Британия мудофаа вазирлигига тегишли махфий ҳужжатлар топилди. Ҳужжатлар орасида бир неча кун аввал Қрим яқинидан сузиб ўтган Defender эсминецининг Қора денгизда ҳаракатланиши ҳақидаги маълумотлар ҳам бўлган. 

50 саҳифадан иборат пачкани топган шахс гап махфий ахборот ҳақида бораётганини англагач, BBC телеканалига мурожаат қилган. У ўз шахси номаълум қолишини истаган. 

Ҳужжатларнинг бир қисми июнда Қрим яқинидан сузиб ўтиб, Россия ҳарбийлари томонидан қатъий жавоб чоралари кўрилишига сабаб бўлган Defender эсминеци ҳақида бўлган.

Ҳужжатларда эсминецнинг Қора денгизда ҳаракатланишига жавобан Россиянинг муносабати қандай бўлиши мумкинлигига баҳо берилган. Жумладан, Британия мудофаа вазирлигида россиялик ҳарбийлар кўриши мумкин бўлган жавоб чораларининг «хавфсиз ва профессионал»дан тортиб «хавфли ва нопрофессионалгача» бўлган учта варианти кўриб чиқилган.

Шунингдек, ҳужжатлардан Британия мудофаа вазирлиги кема йўналишининг иккита вариантини ҳозирлаб қўйгани маълум бўлган. Улардан бири эсминецнинг Қримдан анча наридан ўтиши ва Россия томонидан эътирозга сабаб бўлмаслигини кўзда тутган. Бироқ Лондонда таъкидланишича, воқеаларнинг бундай вариантида Британия ҳарбий-денгиз кучлари ҳарбийлари қўрқиб, қочиб кетгандек кўриниши мумкин бўлган.

Бундан ташқари, ҳужжатлардан маълум бўлишича, Британия расмий шахслари улар тахмин қилган воқеалар ривожи Россияникидан фарқ қилиши мумкинлигини теран англашган.

BBC News’да таъкидланишича, ҳужжатлар кеманинг Британия Украинанинг бир қисми деб ҳисоблайдиган Қрим яқинидан ўтиши «Лондоннинг Киевни қўллаб-қувватлаш мақсадида қабул қилган пухта ўйланган қарори» бўлганини тасдиқлайди.

Ҳужжатлар орасида бошқа масалалар бўйича ҳам маълумотлар бўлган. Хусусан, уларда НАТО қўшинлари Афғонистондан олиб чиқилгандан кейин Британия у ерда ўз махсус қўшинларини қолдириши мумкинлиги ҳақида гапирилган.

Британия мудофаа вазирлигида аввалроқ ходимлардан бири махфий ҳужжатлар йўқотиб қўйилгани ҳақида ҳисобот бергани тасдиқланган.

23 июнда россиялик ҳарбийлар ва чегарачилар Россиянинг Қора денгиздаги чегарасини бузган Defender эсминеци томон огоҳлантирувчи ўқ узгани маълум қилинганди. Россия мудофаа вазирлиги эсминецнинг хатти-ҳаракатларини БМТ конвенциясининг қўпол бузилиши деб баҳолаган ва Британияни кема экипажи ҳаракатларини тергов қилишга чақирган.

24 июнда Британиянинг Россиядаги элчиси Дебора Броннерт Қора денгиздаги ҳодиса сабабли Россия ташқи ишлар вазирлигига чақиртирилган эди.