1 июлдан маҳсулотларнинг 17 рақамли идентификация коди жорий қилинади

17 рақамли код электрон ҳисобварақ, электрон шартнома ва касса чекларида акс этиши лозим.

Давлат солиқ қўмитасининг хабарига кўра, Вазирлар Маҳкамасининг 249-сонли қарорига мувофиқ, маҳсулотлар (товарлар ва хизматлар) нинг ягона электрон миллий каталоги тасдиқланди.

Қарор билан ДСҚга маҳсулотларнинг ягона электрон миллий каталоги (позиция, субпозиция, бренд ва атрибут) ни кенгайтириб бориши, яъни маҳсулот ва хизматларнинг идентификация код (МХИК) ларини шакллантириши ваколати берилди.

Маҳсулот ва хизматларнинг идентификация коди маълум бир маҳсулот ёки хизмат турига тайинланган белгилар (рақамлар) тўплами кўринишида тақдим этилган маҳсулот ва хизматларнинг коди ҳисобланади.

Расмий хабарга кўра:

электрон каталог базасида маҳсулот ва хизматларга босқичма-босқич 17 рақамли идентификация кодлари яратилмоқда;
ҳозирда юқори ликвидли маҳсулотлар, дори воситалари, тамаки ва алкогол маҳсулотлари ҳамда имтиёз қўлланилган маҳсулот ва хизматлар учун 10 мингдан ортиқ идентификация кодлари яратилди;
Вазирлар Маҳкамасининг тегишли қарорларига мувофиқ, МХИК кодлари электрон ҳисобварақ-фактуралар, электрон шартномалар ҳамда онлайн-НКМ ёки виртуал касса чекларида акс эттирилиши лозим;
ўзгаришлар жорий йилнинг 1 июл санасидан оммага тўлиқ жорий қилинади.

Aввалроқ, 1 июлдан бошлаб паррандачилик, оилавий нодавлат мактабгача таълим ҳамда чорвачилик соҳаларига бериладиган имтиёзлар ҳақида хабар қилинганди.

#солиқ #МХИК