Хитой Россия вакцинасини тан олиши тўғрисидаги хабарларни рад этди

Россия ва Хитой коронавирусга қарши вакциналарни ўзаро тан олиши тўғрисидаги хабарлар ҳақиқатга мос эмас. Бу ҳақда Хитойнинг Владивостокдаги бош консулхонаси маълум қилди.

Аввалроқ Deita портали Хитой ва Россия чегараларни очиши ҳамда Россиянинг «Спутник V» ва Хитойнинг CoronaVac вакциналарини ўзаро тан олиши ҳақида эълон қилиши тўғрисида хабар берганди.

«Хитойнинг Владивостокдаги бош консулхонаси бу маълумот ҳақиқатга мос келмаслигини билдиради. Ҳозирда бош консулхона бу борада ҳеч қандай маълумотга эга эмас», — дейилади бош консулхона хабарида.

CoronaVac вакцинаси Хитойнинг SinoVac компанияси томонидан ишлаб чиқарилган иккинчи вакцина ҳисобланади. Мамлакатда биринчи вакцина Sinopharm компанияси томонидан ишлаб чиқилган. Ҳар икки вакцина Жаҳон соғлиқни сақлаш ташкилоти томонидан маъқулланган.