Абу-Дабида коронавирусга қарши чоралар кучайтирилади

БААнинг Абу-Даби амирлигида коронавирус тарқалишига қарши янги чоралар жорий қилиниши эълон қилинди. Улар 19 июл, душанбадан амал қила бошлайди.

Абу-Дабига кириш учун амирликка келишдан олдин 48 соатдан ошмаган вақт ичида топширилган манфий тест ёки бир сутка ичида олинган экспресс манфий ПЦР-тест тақдим қилиниши керак. Аввал 72 соат ичида топширилган манфий тест қабул қилинган. Бу қоида ҳам хорижликларга, ҳам амирлик резидентларига тааллуқли бўлади.

Амирликда узоқроқ муддатга қоладиганлар коронавирусга қайта текширувдан ўтишлари керак бўлади.

Шунингдек, 19 июлдан Абу-Даби ҳудудида соат 00:00дан соат 05:00гача комендантлик соати амал қилади. Бу вақт давомида кўчаларни дезинфекция қилиш учун транспорт ҳаракати тўхтатилади.

Бундан ташқари, савдо марказлари, кинотеатрлар, пляжлар ва умумий овқатланиш шохобчаларига ташриф буюрувчилар сони чекланади.