Бутун дунё бўйлаб ўнлаб компаниялар сайтлари интернетдаги глобал узилиш сабабли ишламай қолди. Фойдаланувчилар ярим соатдан кўпроқ вақт давомида McDonald’s, Lloyds, Bank of Scotland, EA Sports, Microsoft, Google, Amazon, UPS, British Airways, Delta Air Lines, Airbnb, Expedia ва бошқа компаниялар сайтларига кира олишмаган.
Бундан ташқари, иккита энг йирик ўйин тармоғи — PlayStation Network ва Steam ишида ҳам узилишлар кузатилган.
Носозликка DNS-хизматлар кўрсатувчи Akamai компаниясидаги техник муаммолар сабаб бўлган. DNS фойдаланувчилар компьютерларига сайтлар билан боғланишга ёрдам берувчи домен номлари тизими ҳисобланади. Сайтлари ишламай қолган компаниялардан аксарияти Akamai мижозлари бўлган.
Компания носозлик бартараф этилганини маълум қилган.
