Полициячилар жанжал маиший низо ортидан келиб чиққанини аниқлаган. Муштлашув оқибатида икки киши жароҳатланган, улар шифохонага ётқизилган.
Санкт-Петербургнинг Невский районида юз берган оммавий муштлашувдан сўнг полиция 70 кишини қўлга олди, деб хабар берди 78.ru.
Хабарда айтилишича, муштлашув 28 июл куни кечқурун «Белие ночи» меҳмонхонаси яқинида содир бўлган.
Воқеа жойига етиб келган полициячилар маиший низо ортидан Тожикистон ва Чеченистон фуқаролари ўртасида жанжал келиб чиққанини аниқлаган. Муштлашув оқибатида икки киши жароҳатланган, улар шифохонага ётқизилган.
Аввалроқ Россия Ички ишлар вазирлиги Россия ҳудудида оммавий муштлашувларда иштирок этадиган чет элликлар мамлакатдан чиқариб юборилиши ва давлатга қайтиб кириши тақиқланишини маълум қилганди.
«Хорижий фуқароларга нисбатан суд идоралари маъмурий жавобгарликка тортиш ва 15 кунлик муддатга маъмурий ҳибсга олиш тарзида жазо тайинлаш тўғрисида қарор чиқарди. Қилинган хатти-ҳаракатлар жамоатчилик учун хавф келтирганини ҳисобга олган ҳолда, ушбу хорижий фуқароларнинг Россияга киришига йўл қўймаслик тўғрисида қарорлар қабул қилинди. Агар улар Россия Федерацияси ҳудудидан мустақил равишда чиқиб кетмаса, унда депортация қилиш чоралари кўрилади», дейилади Россия ИИВ хабарида.
