Гидрометеорология хизмати маркази берган маълумотга кўра, 3-5 август кунлари кутилаётган маҳаллий ёмғирлар сабабли Ўзбекистоннинг тоғ олди ва тоғли ҳудудларида сел келиши хавфи мавжуд.
ФВВ матбуот хизмати тоғ ва тоғ олди ҳудудларида яшовчи аҳолини эҳтиёт чораларини кўришга чақириб, нохуш вазиятлар вужудга келганда вазирликнинг 1050 қисқа рақамига мурожаат этишни сўради.
Эслатиб ўтамиз, 13 июль куни Қирғизистон ҳудудида кучли ёмғир ёғиши оқибатида Наманган вилоятининг Косонсой туманига сел келганди. Ҳодиса оқибатида 9 киши ҳалок бўлиб, 6 киши жароҳатланди.
Шунингдек, Наманган вилояти Поп тумани тоғли «Имомота» МФЙ ҳудудларидаги сойда 20 июль кечаси кучли сел бир қанча машиналарни оқизиб кетди.
22 июль куни Қашқадарё вилоятининг Шаҳрисабз туманининг тоғли ҳудудларида кучли ёмғир ёғиб, сел келди.
