Беларуслик енгил атлетикачи Кристина Тимановская Варшавага учиб кетди

Польшанинг LOT авиакомпанияси самолёти ўз бортида беларуслик енгил атлетикачи Кристина Тимановская билан Токионинг Нарита аэропортидан Варшавага учиб кетди. Аввалроқ Олимпиада иштирокчиси бўлган Тимановская беларуслик спорт амалдорларини танқид қилгандан кейин Токиодан Минскка мажбуран олиб чиқиб кетилмоқчи бўлган.

Тимановская рейсга VIP-терминал орқали рўйхатдан ўтган. Спортчи Токиодаги охирги 2 кунни ўтказган Польша элчихонасидан аэропортга полиция машинасида келтирилган.

Олимпиадада 100 метр ва 200 метр масофаларга югуриш мусоқабаларида қатнашиши керак бўлган спортчи унинг розилигисиз 4х400 метр эстафетага қўйилгани учун енгил атлетика бўйича миллий терма жамоа мураббийлар штабини ижтимоий тармоқларда танқид қилган.

Шундан кейин Беларус Миллий олимпия қўмитаси 1 августда мамлакатнинг енгил атлетика бўйича мураббийлар штаби Тимановскаяни “руҳий-эмоционал ҳолати” сабабли уйга қайтаришга қарор қилганини маълум қилган. Мухолифатдаги Беларус спорт бирдамлиги жамғармаси вакиллари Тимановская Токиодан Минскка мажбуран олиб чиқиб кетилаётганини маълум қилишган. Шундан кейин спортчи ўз ҳаёти учун хавотирини ва Европада бошпана сўрамоқчилигини маълум қилган. Бундан ташқари, енгил атлетикачи Халқаро Олимпия Қўмитасидан вазиятга аралашишни сўраган. Унинг таъкидлашича, унга босим ўтказилган ва уни Япониядан мажбуран олиб чиқиб кетмоқчи бўлишган.

2 августда Польша ташқи ишлар вазири ўринбосари Марчин Пшидач Тимановская Польшанинг гуманитар визасини олганини маълум қилган. Таъкидланишича, Беларус Миллий олимпия қўмитаси Тимановская атрофидаги вазиятни кузатмоқда ва бу масалада Токио-2020 ташкилий қўмитаси ва ХОҚ билан ҳамкорлик қилмоқда.