Японияда рекорд даражада кунлик касалланиш қайд этилди

Японияда охирги суткада коронавирус пандемияси бошидан бери мамлакат учун рекорд даражада кунлик касалланиш қайд этилди.

Фото: Issei Kato / Reuters

Кунчиқар мамлакатда бир кунда 14207та касалланиш ҳолати аниқланган. Аввалги антирекорд 31 июлда қайд этилган ва бир суткада 12337 кишида вирус аниқланган.

Ҳозирда Олимпиада ўтаётган Токиода ҳам антирекорд қайд этилди. Япония пойтахтида охирги суткада 4166та касалланиш ҳолати аниқланди. 31 июлда Токиода ҳам рекорд даражада кунлик касалланиш қайд этилган.

Эпидемиологик вазият ёмонлашгани сабабли Токиода 31 августгача фавқулодда вазият режими амал қилмоқда. Шунингдек, Сайтама, Тиба, Канагава ва Осака префектураларида ҳам коронавирусга қарши чекловлар кучайтирилган.

Бир кун аввал Япония соғлиқни сақлаш вазирлиги хориждан келгандан кейин карантинга амал қилмаган фуқаролар исмини ошкора эълон қилган. Ўрнатилган тартиб-қоидаларга кўра, бундай карантин 2 ҳафта давом этиши лозим.