Месси қаерга кетади: «ПСЖ»? «Сити»? Ёки барибир «Барса»да қоладими?

5 август, пайшанба оқшомидаги кутилмаган хабар футбол оламини «портлатди»: «Барселона» Лионель Месси 18 йиллик фаолиятидан кейин клубни тарк этиши ҳақида расман эълон қилди. Шартномани узайтириш бўйича келишувга эришилгани, бу ҳақда тез орада расман эълон қилиниши ҳақидаги хабарлар ортидан кутилмаганда Месси билан шартномани янгилашнинг имкони бўлмагани маълум бўлди. Ла Лигадаги молиявий чекловлар сабабли бир-бирига деярли синоним сўзларга айланган Месси ва «Барса»нинг йўллари бу сафар айро тушди. Қарийб 40 кундан буён жамоасиз бўлган Месси энди қаерга йўл олади?

«ПСЖ»

Аргентиналик ҳужумчи учун эҳтимоли энг юқори бўлган манзил – Париж. Европанинг барча клублари орасида Мессининг маошини тўлашга қурби етадиган кам сонли клублардан бири айнан «ПСЖ»дир. Лионель «Барса»да йилига ўртача 138 миллион евро маош оларди ва молиявий вазият туфайли маоши 50 фоизгача қисқаришига ҳам рози бўлганди. Шунга қарамай, Мессига йилига 50 миллион евро маош беришни ҳамма клуб ҳам ўзига раво кўролмайди. «ПСЖ» учун эса бу муаммо эмас.

Парижликлар ўтган йилда ҳам Мессини ўз сафига қўшиб олишни исташган, қишда эса Анхель Ди Мария «Барса» ҳужумчисининг Францияга кўчиб келиш эҳтимоли юқорилигини айтганди. Дарвоқе, бир неча кун олдин Лионель «ПСЖ» футболчилари – Ди Мария, Неймар, Паредес ва Верратти даврасида суратга тушганди. Бу эса аргентиналикнинг Парижга кўчиб ўтиши ҳақидаги миш-мишларни реалликка айлантираётгандек.

Қатарлик шайхлар Парижда орзудаги жамоани тузишмоқда: ёзда клуб Ҳакими, Доннарумма, Вейналдум, Рамос сингари юлдузларни таклиф этганди. Қизиғи, бу юлдузларнинг уч нафари Парижга эркин агент сифатида келган. Месси ҳам Франция топ-клубига трансфер пулисиз келиб қўшилиши мумкин.

«Манчестер Сити»

Пеп Гвардиола 2000-йиллар охири ва 2010-йиллар бошида Месси билан бирга афсонавий «Барса»ни яратган ва бу сафар уларнинг «Манчестер Сити»да яна биргаликда ишлаши катта воқелик бўларди. Бир йил аввал Суареснинг «Камп Ноу»ни тарк этиши маълум бўлгач, Лео клуб раҳбариятига норозилик демарши сифатида каталонияликлар машғулотларига бормай қўйгач, «шаҳарликлар» уни Манчестерга олиб келишга уринганди. Испан матбуотига ишонилса, Гвардиола ўшанда Месси билан суҳбатлашиб, уни клубда қолишга чақириб, «Манчестер Сити»га ўтишидан барча зарар кўришини тушунтирган. Ўшанда «Сити» молиявий фэйр-плей қоидаларини бузишда айбланиб, УЕФА томонидан еврокубоклардан четлатилишига оз қолганди.

«Манчестер Сити» учун ҳозирги вазиятни аввалгисидан яхши деб бўлмайди. «Барса»нинг Месси ҳақидаги баёнотидан ярим соат ўтиб, «Сити» Жек Грилиш трансферини эълон қилди. «Астон Вилла» яримҳимоячиси учун 117,5 миллион евро тўланган. Энди эса раҳбарият «Тоттенҳэм»дан Ҳарри Кейн трансферини амалга ошириш ишларини олиб бормоқда.

Аммо ўтган йилдан фарқли жиҳати бу сафар Месси учун трансфер пули тўланмайди. Шундай экан, Леонинг яна Гвардиола қўл остида тўп суриш имкониятини рад этиб бўлмайди.

Италия

Ўтган ёзда «Интер» Мессини сотиб олмоқчи бўлган клублардан бири бўлганди – клубнинг хитойлик эгалари аргентиналикни Миланда кўрмоқчи эди. Аммо пандемия даврида юзага келган молиявий қийинчиликлар сабабли Suning Commerce Group Хитойдаги клубларни молиялаштириш тўхтатилганини эълон қилди ва бу «Интер»га ҳам ўз таъсирини ўтказмай қўймади. «Интер»ни чемпион қилган мураббий Антонио Контенинг жамоани тарк этиши ҳам клубнинг мақсадлари ўзгаргани билан боғлиқ эди. Иқтисодий қийинчиликлар туфайли «Интер» голеадори Ромелу Лукакуни ҳам «Челси»га сотишга тайёрланмоқда.

Месси учун Италиядаги яна бир қизиқарли вариант – «Ювентус». Аммо бу орзудаги трансферлар туркумидан. Ҳар қандай мухлис Криштиану Роналду ва Мессини бир жамоада кўришни истайди, бу «Юве» учун ҳам аудиториянинг жуда кенгайишига сабаб бўларди. Бироқ ҳозирда воқеалар ривожининг бундай тус олишига ишониш қийин.

МЛС

Мессида Европадан ташқарида ҳам вариантлар талайгина. Лео 2013 йилда берган интервьюсида карьераси якунида Аргентинага қайтиб, футболчилик фаолиятини илк клуби «Ньюэллс Олд Бойз»да тугатмоқчи экани ҳақида айтганди. У айнан ушбу жамоадан «Барселона»га ўтган.

Аммо 34 ёш – фаолиятни якунлаш ҳақида ўйлаш учун эрта. МЛС – реалроқ вариант. Март ойида Mundo Deportivo нашри Месси 2023 йилда Дэвид Бекҳэм эгалигидаги жамоа – «Интер Майами» сафига ўтиши ҳақида ёзган эди. Балки, барчаси тезроқ амалга ошар, ким билади дейсиз?

«Барселона»

Албатта, «Барса» ҳақида унутишга ҳали эрта. Тўғри, каталонияликлар Месси клубдаги фаолиятини давом эттирмаслигини маълум қилишди, аммо баёнот жуда жўн ёзилган. Ҳозирда шуниси аниқки, Ла Лигада келишувларни рўйхатдан ўтказиш қоидалари сабабли шартнома имзолаб бўлмайди, аммо Месси ва «Барса» барчасини келишиб бўлган.

Шундан келиб чиқилса, клубнинг Месси борасидаги баёноти – ва-банкка бориш ва шу йўл орқали Ла Лига президенти Хавьер Тебасга босим ўтказишга уринишга ўхшамоқда. У лига раҳбари сифатида молиявий қоидаларни юмшатиш ва «Барса» учун маошлар чеклов миқдорини ошириш имкониятига эга шахс. Шундай экан, Месси учун «Барселона» эшиклари ҳали ҳамон очиқ.

«СЭ» нашридан У.Ибодов таржимаси.