«ПСЖ» «Барселона»ни эркин агент сифатида тарк этган ҳужумчи Лионель Мессини ўз сафига қўшиб олишга ҳаракат қилмоқда.
Журналист Жанлука Ди Марционинг ёзишича, томонлар аллақачон музокараларни бошлашган ва «ПСЖ» аргентиналик футболчини ўз лойиҳасига ишонтиришга умид қилмоқда.
Каталониядаги RAC радиосининг хабар беришича, «Барселона» раҳбарияти 34 ёшли футболчи билан шартномани узайтириш умидини йўқотмаган. Клуб вазиятни ўта оғир деб ҳисоблайди, аммо имконсиз даражада эмас. Энди директорлар кенгаши барча нарсани ҳар томонлама муҳокама қилмоқчи. Президент Жоан Лапорта эса тез орада вазият бўйича тушунтириш бериши кутилмоқда.
Мессининг ўзи эса «Барселона» билан шартномани узайтириш борасидаги музокаралар бузилишини кутмаганди. У клуб билан шартнома узайтирилишига умид қилган. Таъкидланишича, вазият футболчининг руҳий ҳолатига таъсир қилган.
Эслатиб ўтамиз, 5 август куни «Барселона» Мессининг жамоадан кетганини, томонлар молиявий чекловлар туфайли янги шартнома имзолай олишмаганини эълон қилди.
Аргентиналик футболчининг «кўк-анорранглилар» билан шартномаси июнь ойи охирида тугаганди. У бутун фаолияти давомида каталонияликлар таркибида ҳаракат қилган. Ўтган мавсумда Ла Лигада 35та ўйин ўтказиб, 30та гол ва 9та ассистни ўз ҳисобига ёздириб қўйган.
