Японияда вулқон отилиши натижасида янги орол пайдо бўлди

Япония соҳилбўйи қўриқлаш хизмати мамлакатнинг денгиз ҳудудида янги оролни аниқлади. Орол сувости вулқонининг отилиши натижасида ҳосил бўлган.

Фото: Kyodo

Kyodo News нашрининг хабар беришича, вулқон 13 августда отилган, орол эса 15 августда аниқланган. Япония метеорология агентлиги янги орол яқинида катта миқдорда тутун ва кул борлигидан огоҳлантирган.

Вулқон фаоллашгани сабабли унинг такроран отилиши кутилмоқда.

Таъкидланишича, янги орол бир километр диаметрга эга бўлиб, “С” ҳарфи кўринишини олган.

Японияда вулқон отилиши натижасида ороллар ҳосил бўлиши 1904, 1914 ва 1986 йилларда кузатилган. Бироқ ушбу оролларнинг барчаси ҳозирда сув остига кетган.