КХДР 2,7 млн доза коронавирусга қарши вакцинани қабул қилишдан бош тортди

Мамлакат Соғлиқни сақлаш вазирлиги рад этиш сабабини глобал вакцина етказиб беришдаги муаммолар ва бошқа мамлакатларда касаллик авж олаётгани билан изоҳлаган.

Фото: Reuters

Шимолий Корея ҳукумати Хитойнинг Sinovac компанияси томонидан ишлаб чиқарилган коронавирусга қарши вакцинани қабул қилишдан бош тортди. КХДР вакцинани пандемиядан кўпроқ азият чекаётган мамлакатларга жўнатишни тавсия қилган. Бу ҳақда Wall Street Journal хабар берди.

Хабарда айтилишича, мамлакат Соғлиқни сақлаш вазирлиги COVAX ташаббуси доирасида таклиф этилган 2,7 млн доза Sinovac препаратини қабул қилишни рад этган.

Вазирлик рад этиш сабабини глобал вакцина етказиб беришдаги муаммолар ва бошқа мамлакатларда касаллик авж олаётгани билан изоҳлаган.

Июлда Шимолий Корея ножўя таъсирлардан хавфсираб AstraZeneca вакцинасини олишни рад этганди.