Бразилия президенти тарафдорлари мамлакат конгрессига ҳужум қилди

Болсонарунинг олий суд ва конгресс билан қатор масалаларда келиша олмаётгани ортидан унинг тарафдорлари умуммиллий намойишлар ўтказмоқда.

Фото: Eraldo Peres/AP

Бразилия президенти Жаир Болсонарунинг тарафдорлари мамлакат конгресси биносига киришга уринди ва полиция билан тўқнашувлар уюштирди. Бу ҳақда The Guardian хабар берди.

Қайд этилишича, ўнг фаоллар эрта тонгда конгресс биносига киришга уринган. Ҳарбий полиция уларга қарши махсус воситалардан фойдаланган. Тартибсизликлар иштирокчилари олий суд биносига ҳужум қилишларини айтишган.

Мамлакат пойтахти Бразилиа шаҳридаги марказий майдон Болсонару тарафдорлари билан тўлиб-тошгани айтилмоқда.

Ҳар йили 7 сентябрда Бразилияда мамлакат мустақиллиги куни нишонланади. Мамлакат 1822 йилда Португалиядан мустақиллигини эълон қилган.