ЎзЛиДеп партияси томонидан президентликка номзод сифатида илгари сурилаётган Шавкат Миромонович Мирзиёев ўз ҳаётининг мазмуни Ўзбекистон халқига хизмат қилиш эканлигини билдирди.
“Халқ ишончи қандай буюк қудрат ва илҳом манбаи эканини, ўтган йиллар давомида барчамиз чин юракдан ҳис этиб келмоқдамиз, десам, ўйлайманки, сизлар ҳам бу фикрга қўшиласиз.
Айнан ана шу буюк ишонч энг қийин дамларда бизга умид ва мадад берди, вужудимизга – куч, руҳимизга қанот бағишлади.
Ана шу юксак ишончга муносиб бўлиш, халқимиз, Ватанимиз манфаатлари ҳамда унинг бахт-саодати йўлида, бор куч-ғайратим, билим ва салоҳиятимни сафарбар этиш, мен учун ҳамиша ҳаётимнинг мазмуни бўлиб келган ва бундан кейин ҳам, ҳамиша шундай бўлиб қолади.
Мен учун бундан улуғ бахт, бундан буюк шараф ва масъулият йўқ ва бўлиши ҳам мумкин эмас.
Она халқим билан бирга Янги Ўзбекистонни қуриш, Учинчи Ренессанс пойдеворини барпо этишдек улкан бахт насиб этгани учун, Яратганга чексиз шукроналар айтаман.
Бу йўлда олийжаноб халқимиз билан, ҳар қандай синов ва машаққатларни енгиб ўтишга тайёрман.
Жонажон Ватанимиз ўз тараққиётининг ҳал қилувчи босқичига қадам қўяётган мана шу тарихий дамларда, кўпмиллатли халқимизга мурожаат қилиб айтмоқчиман: сизлар билан бирга, қанча мураккаб марра ва довонлардан ўтдик.
Аммо ҳеч қачон ярим йўлда тўхтаб қолмадик. Баъзан толиққан ва чарчаган пайтларимиз ҳам бўлди. Лекин ҳеч қачон тушкунликка тушмадик. Келажакка, ёруғ кунларга ишончимизни асло йўқотмадик.
Мен учун халқимга хизмат қилишдан муҳимроқ вазифа йўқ. Мен шу халқимдан куч оламан. Фуқароларимиз муаммоларини айтишганида, бундан-да оғир муаммолар борлигини биламан ва ечишга ҳаракат қиламан.
Чунки, ҳамиша куч-қувват берадиган, болам, деб бағрига босадиган халқимиз бор, бетакрор Ватанимиз бор. Бу гаплар маъруза эмас – ҳаётим мазмуни!
Энди мен ҳам 5 йил олдинги президент эмасман, сизлар ҳам 5 йил олдинги делегатлар эмассизлар. Дунё ўзгаряпти, биз ҳам ўзгаряпмиз, тажриба орттиряпмиз. Бу ўзгаришлар оддий ўзгаришлар эмас. Ҳали бу кунларимиз тарихимизга шонли ҳарфлар билан битилади”, – деди президент ўз нутқида.
