Tashkent City’даги боғ хусусийлаштирилади

Айни пайтда замонавий дам олиш ва истироҳат боғи «Tashkent city» халқаро ишбилармонлик маркази дирекцияси» Давлат унитар корхонаси балансида сақланмоқда.

Фото: Kun.uz

Давлат активларини бошқариш агентлиги «Tashkent city»даги замонавий дам олиш ва истироҳат боғини келгусида хусусийлаштириш ва эксплуатация қилиш юзасидан «Мастер план» ишлаб чиқиш учун профессионал ташкилотлар жалб этилиши тўғрисида эълон жойлаштирди.

Эълонга кўра, 2020 йилда ишга туширилган, «Tashkent city» халқаро ишбилармонлик маркази ҳудудидаги 23,4679 га умумий ер майдонига, 3 933 кв.м бино ва иншоотлар умумий майдонига эга замонавий дам олиш ва истироҳат боғини баҳоланган қийматда очиқ танлов савдолари орқали сотиш режалаштирилган.

Шунинг учун «Tashkent city» халқаро ишбилармонлик маркази дирекцияси» ДУК балансида сақланаётган объектни хусусийлаштириш ва ундан келгусида фойдаланиш бўйича «Мастер план» ишлаб чиқишда профессионал ташкилот жалб этилиши белгиланган.

Ўзбекистон Республикаси Давлат активларини бошқариш агентлиги хусусийлаштириш шартлари ва шакллари бўйича профессионал ташкилотларни танлаб олиш юзасидан танлов эълон қилди.

«Мастер план» объектни хусусийлаштириш ва уни эксплутация қилиш бўйича таклиф этиладиган тартиб ва талаблар қонунчиликка мувофиқ бўлиши, шунингдек объектнинг индивидуал хусусиятларини ҳисобга олган ҳолда ишлаб чиқилиши лозим.

Профессионал ташкилот белгиланган шарт асосида «Мастер план»ни ишлаб чиқади, у бўйича барча зарурий хизматларни кўрсатади. Таклифлар 2021 йил 25 октябр соат 17:00 гача қабул қилиниши белгиланган.

Аввалроқ «Tashkent City» боғи ҳудудига 2020 йил 17 декабрдан бошлаб пулли қилинган кириш 14 октябрь кунидан бошлаб яна бепул бўлгани хабар қилинган эди. Тошкент шаҳри ҳокими Жаҳонгир Ортиқхўжаев эса «Tashkent City» боғини эксплуатация қилиш харажатлари ойига 900 млн сўмни ташкил этаётганини билдирган эди.

#Tashkent City