Путин Россияни НАТОга қабул қилишни сўраган – Алянснинг собиқ бош котиби

Россия президенти Владимир Путин Россия НАТО аъзосига айланишини хоҳлаган. Бироқ у бунга аъзоликка ариза топшириш жараёнидан ўтмасдан ва навбат кутмасдан эришмоқчи бўлган. Бу ҳақда НАТОнинг собиқ бош котиби Жорж Робертсон One Decision подкасти учун изоҳларда айтиб ўтди.

Владимир Путин / Фото: Evgeniy Paulin/Sputnik/EPA

Алянсга 1999 йилдан 2004 йилгача раҳбарлик қилган Робертсон Путин билан илк учрашуви тафсилотлари ҳақида сўзлаб берган. Унинг таъкидлашича, ўшанда Россия Ғарбий Европанинг бир қисми бўлиш истагини билдирган.

“Улар хавфсиз, барқарор ривожланаётган Ғарбнинг бир қисми бўлишни исташган. Ўшанда буларнинг бари Россияда йўқ эди”, деб сўзлаб берган Робертсон.

Собиқ бош котибнинг айтишича, Путин ундан “Бизни НАТОга қачон таклиф қилмоқчисиз?”, деб сўраган. Робертсон бунга жавобан “НАТОга ҳеч ким таклиф қилинмаслиги, унга кириш кераклигини, бунинг учун ариза берилиши лозимлигини” айтган. Путин бунга “Россия аҳамиятга эга бўлмаган давлатлар билан бир навбатда турмайди”, деб жавоб қилган.

Робертсоннинг таъкидлашича, Путиннинг НАТОга кириш борасидаги фикри Украинадаги 2004 йилги инқилобдан кейин ўзгарган. Ўша воқеалардан кейин Россия президенти Ғарбга шубҳа билан қарай бошлаган ва уни “Украинанинг ишларига аралашувда” айблаган. Шунингдек, Робертсоннинг таъкидлашича, Россия алянсга Марказий ва Шарқий Европанинг бир қатор давлатлари қўшилганидан “аччиқ билдирган”.

Собиқ бош котибнинг бу сўзлари Путиннинг 21 йил аввал Россия президенти лавозимига киришишидан олдин “BBC” телеканалига берган интервьюси билан мос келади. Ўшанда Путин “Россиянинг нуқтайи назарлари тенг ҳуқуқли ҳамкор фикрлари каби қабул қилинса”, Россия НАТОга кириши мумкинлигини айтган.

Путин ўшанда НАТОни душман сифатида тасаввур қила олмаслигини айтган. “Россия Европа маданиятининг бир қисми. Мен ўз давлатимни Европадан ва биз маданиятли дунё деб атайдиган дунёдан яккаланган ҳолда тасаввур қила олмайман”, деб таъкидлаб ўтган Путин.

Аввалроқ Россия президенти матбуот котиби Дмитрий Песков Франция ОАВга берган интервьюсида Украинанинг НАТОга кириши Россиянинг миллий манфаатлари учун энг ёмон сценарий бўлишини, бу Москвани ўз хавфсизлигини ҳимоялаш учун фаол ҳаракатларга ундаши мумкинлигини айтган.

Ўз навбатида, Украина ташқи ишлар вазири Дмитрий Кулеба Песковнинг бу сўзларига кескин жавоб бериб, энг ёмон сценарий юз бериб бўлганини айтган.

#Россия #НАТО #Владимир Путин