Зангиотадаги COVID марказида 112 ёшли бемор тузалди

Шифохона Жонлантириш бўлими мудири Ўткир Қодировнинг Kun.uz’га маълум қилишича, 112 ёшни қоралаган Ризаева Маржон Азиз қизида касаллик аломатлари 21 сентябрда сезилган.

“Дастлаб касаллик йўтал ва тана ҳароратининг кўтарилиши билан бошлангани учун онахон таниш шифокорига мурожаат қилган ва уй шароитида муолажа олган. Бироқ аҳволи яхшиланмаган, аксинча оғирлашиб қолган. Шундан сўнг бемор тез тиббий ёрдам машинасида Зангиотадаги 2-сонли махсус шифохонага олиб келинган.

Қабул бўлимида бемордан олинган экспресс тест мусбат натижа кўрсатган. 15 октябрда ўтказилган мультиспирал компьютер томографияси текширувида ўпка тўқимасининг 86 фоизи зарарлангани маълум бўлди. Текширув натижаларига асосланиб бемор шифохонанинг жонлантириш ва интенсив терапия бўлимига олинди”, дейди Ўткир Қодиров.

Шифокорнинг сўзларига кўра реабилитация муолажаларидан сўнг мустақил нафас ола бошлагач, 14 ноябрь куни беморга уйига рухсат берилган.

Маржон Ризаева 1909 йилнинг 1 июль куни Арманистонда туғилган. Миллати озар, Озарбойжон Республикаси фуқароси. У коронавирусдан соғайган дунёдаги энг кекса одамлардан бири бўлди.

Аввалроқ Испанияда 113 ёшли Мария Браньяс, Нидерландияда 107 ёшли Корнелия Рас, АҚШда 104 ёшли уруш фахрийси, Хитойда 103 ёшли аёл коронавирусдан соғайиб кетгани маълум қилинганди.