Элчи Халқ таълими вазирлигининг янги раҳбари бўлади

Олий Мажлис Қонунчилик палатасининг 17 ноябрдаги ялпи йиғилишида ҳукуматнинг икки аъзоси номзоди кўриб чиқилди. 

«Маълумки, амалдаги қонун ҳужжатларига биноан, Вазирлар Маҳкамаси аъзолари, вазирлар лавозимга тайинланишидан аввал уларнинг номзоди Олий Мажлис Қонунчилик палатасида депутатлар томонидан кўриб чиқилади.

2021 йил 17 ноябрь куни Олий Мажлис Қонунчилик палатасининг навбатдаги мажлиси бўлиб ўтди. 

Унда депутатлар Ахборот технологиялари ва коммуникацияларини ривожлантириш вазири лавозимига Шерзод Шерматов номзодини ҳамда Халқ таълими вазири лавозимига Бахтиёр Саидов номзодини кўриб чиқдилар ва маъқулладилар», дейилади Қонунчилик палатаси матбуот хизмати хабарида.

Бахтиёр Саидов 1981 йилда Самарқанд вилоятида туғилган, 2002 йилда Тошкент давлат иқтисодиёт университетини тамомлаган.

У 2016 йил январидан «Ўзбекенгилсаноат» АЖ бошқаруви раисининг биринчи ўринбосари — бош менежери бўлган.

2017 йил июлида Ўзбекистоннинг Хитой Халқ Республикасидаги дипломатик миссияси раҳбари этиб тайинланган. У 2018 йил апрелидан Мўғулистон, 2019 йил июлидан Филиппиндаги (қароргоҳи Пекинда жойлашган) элчи вазифасини ҳам бажариб келаётганди.

Бундан аввалроқ Халқ таълими вазирлигига 2018 йил июнидан буён раҳбарлик қилиб келган Шерзод Шерматов Ахборот технологиялари ва коммуникацияларини ривожлантириш вазири лавозимига ўтказилаётгани хабар қилинганди.