ЕИ барча эмланганлар учун чегараларини қачондан очиши маълум бўлди

ЕИ ҳудудига фуқаролари эркин кириши мумкин бўлган мамлакатлар “яшил рўйхати” бекор қилиниб, сайёҳнинг эмланганига қараб унинг киришига рухсат берилади.

Фото: AP

Еврокомиссия 2022 йил 1 мартдан барча учинчи мамлакатлар фуқаролари учун ЕИ ҳудудига киришга қўйилган тақиқни бекор қилмоқчи. Бу ҳақда ЕК сайтида маълум қилинди.

Унга қадар мамлакатларга қараб эмас, сайёҳларнинг эмланганига қараб уларнинг киришига рухсат бериш механизмини жорий этиш режалаштирилмоқда.

Ушбу қарорга келинишига мамлакатлар рўйхатини мунтазам янгилаб туриш мураккабликлар келтириб чиқараётгани сабаб бўлди. Эндиликда ЕИ ҳудудига фуқаролари эркин кириши мумкин бўлган мамлакатлар “яшил рўйхати” бекор қилинади.

“Дунё бўйича вакцинация кўлами кенгайиши муносабати билан мамлакат эмас, сайёҳнинг мақомидан келиб чиққан ҳолда киришига рухсат берилади. ЕИ таркибига кирмайдиган мамлакатлар вакцинация кўрсаткичларини янада оширишига вақт бериш учун бу ўзгариш 2022 йил 1 мартдан бўлади”, - дейилади баёнотда.

Қайд этилишича, ЖССТ маъқуллаган, аммо Европа дори воситалари агентлиги маъқулламаган вакцина билан эмланганлар коронавирусга топширган тести манфийлиги тўғрисидаги ҳужжатни кўрсатиши керак бўлади.