ЖАРнинг Юқумли касалликлар миллий институти ижрочи директори Адриан Пуреннинг таъкидлашича, коронавируснинг мамлакатда аниқланган янги тури — омикрон-штамм дастлаб мутахассислар таъкидлаганидек инсон учун унча хавфли эмас, чунки оғир ҳолатларни келтириб чиқармайди.
“ЖАРда охирги ҳафтада янги касалланиш ҳолатлари кескин кўпайиб кетиши омикрон-штамм билан боғланганига қарамай, у шифохонага ётқизилганлар сони кескин ошишига олиб келмади. Бу яхши аломат”, деб айтган мутахассис eNCA телеканали эфирида.
Маълумотларга кўра, мамлакатда коронавирусдан ўлим даражаси охирги ой давомида паст даражада қолмоқда. Жумладан, охирги суткада бу кўрсаткич 8 ўлимни ташкил қилган.
“Омикрон-штамм генетик нуқтайи назардан коронавируснинг аввалги штаммларидан анча фарқ қилади, у юқори даражада мутация қилади. Бироқ ундан қўрқмаслик керак, дунё илм аҳли ушбу штаммни ўрганишнинг илк босқичларида ва унинг инсон учун хавфлилиги борасида бирор хулоса чиқаришга ҳали эрта”, деб қўшимча қилган Пурен.
Мутахассис янги штамм яқиндагина ЖАРдаги лабораториялардан бирида аниқланганини эслатиб ўтган. “Эҳтимол, ушбу вариант биз билан бирга ҳозирда ўйланаётгандан кўра кўпроқ вақтдан бери бўлиб келаётган бўлиши мумкин. Ҳозирча у ҳақда мавҳумликлар кўп, бироқ ушбу штамм инсондан инсонга юқори даражада ўтади. Мавжуд маълумотлар у билан биринчи навбатда ёшлар касалланаётганини кўрсатмоқда, бироқ шифохонага ётқизилиши талаб этилувчилар сони ошмаяпти”, деб қўшимча қилган мутахассис.
Пурен омикрон-штаммдан асосий ҳимоя эмлаш ҳисобланишини айтган. “Янги штамм ҳам коронавирус ва мавжуд вакциналар унинг фаоллигини пасайтиради”, деб ўз сўзларини якунлаган мутахассис.
Жанубий африкалик яна бир мутахассис Анжелик Кутзенинг таъкидлашича, янги штаммга чалинганларнинг аксарияти ёшлар бўлиб, улар асосан кучли толиқишдан шикоят қилишмоқда. Шу билан бирга, уларда ҳид ва таъм сезиш билан муаммолар кузатилмаган.
