Орбан ҳимоя қилган собиқ вазир АҚШга қочиб кетди

Бу ҳақда 10 май куни Польшанинг ҳуқуқ-консерватив Republika телеканали хабар берди.

Телеканал эфирида чиққан лавҳада Збигнев Зёбро 9 май куни АҚШга етиб келганини айтган. Шунингдек, Польшанинг TVN24 телеканали сиёсатчини Ньюарк Либерти аэропортида кўришганини маълум қилди. Канал бошқа йўловчи томонидан олингани айтилган аэропортдаги суратни ҳам эълон қилган.

Польша Бош прокуратураси Зёбронинг Шенген ҳудудини тарк этгани ҳақидаги хабарларни текшираётганини билдирди. Идора маълумотига кўра, сиёсатчининг Польша паспорти аввалроқ олиб қўйилган.

Бироқ ОАВда Зёбро ва унинг қидирувдаги ўринбосари Марчин Романовский Венгрияда “Женева паспорти” — қочқинлар учун сафар ҳужжатини олган бўлиши мумкинлиги ҳақида тахминлар пайдо бўлган.

Польшанинг Onet портали маълумотига кўра, Зёбро АҚШга Republika телеканали журналисти сифатида иш визаси билан кирган.

Телеканал бу маълумотни билвосита тасдиқлаб, қочқин сиёсатчини АҚШга ўзининг “сиёсий шарҳловчиси” сифатида таклиф қилганини билдирган.

Gazeta Wyborcza газетаси ёзишича, Зёбро ва унинг рафиқасига виза беришни шахсан Дональд Трамп маъқуллаган. Нашрга кўра, Зёбро аъзо бўлган “Ҳуқуқ ва адолат” (PiS) партияси Трампнинг MAGA ҳаракати билан яқин алоқаларга эга.

Польша адлия вазири Вальдемар Журек Польша АҚШ ва Венгриядан Зёбро қандай қилиб амал қилувчи ҳужжатларсиз икки давлат чегарасини кесиб ўтгани бўйича тушунтириш сўрашини айтди.

Унинг таъкидлашича, Варшава қочқин собиқ вазирни “Польша адлияси олдида жавобгар қилиш” ҳаракатларини тўхтатмайди.

Зёбро эса Republika телеканалига берган интервьюсида: “Агар улар экстрадиция жараёнини бошламоқчи бўлса — марҳамат”, — деди.

Сиёсатчи АҚШ судлари орқали экстрадиция жараёни “мураккаб процедура” эканини ҳам таъкидлади.

Збигнев Зёбро Виктор Орбан ҳукмронлиги даврида Венгрияда бошпана топган европалик сиёсатчилардан бири ҳисобланади.

Польша ҳукумати уни коррупция, маблағларни талон-торож қилиш ва ваколатни суиистеъмол қилишда айбламоқда.

Тергов маълумотларига кўра, Зёбро жиноят қурбонлари учун мўлжалланган махсус фонд маблағларини сарфлаб, Pegasus Исроил жосуслик дастурини сотиб олган. Терговчилар фикрича, ушбу дастур 2015–2023 йилларда Польшада ҳокимиятда бўлган PiS партияси рақибларини кузатиш учун ишлатилган.

2024 йилда Венгрия Зёбронинг ўринбосари Марчин Романовскийга бошпана берган. Орадан деярли бир йил ўтиб, собиқ адлия вазири ҳам шу мамлакатда яширинган.

Ўша пайтда Венгрия бош вазири бўлган Виктор Орбан ва унинг ҳукумати Венгрияга келган амалдорларга қарши таъқибларни “сиёсий сабабли” деб атаган.

2026 йил январь ойида Зёбро Венгриядан бошпана олгани маълум бўлганида, Орбаннинг асосий рақиби Петер Мадьяр мамлакат “хорижий жиноятчилар учун паноҳгоҳга айланмаслиги” учун курашишини айтган эди.

Апрель ойида парламент сайловида ғалаба қозонганидан кейин Мадьяр Польшага қочқин амалдорларни қайтариш йўлини топишини яна бир бор таъкидлади. Шу билан бирга, у улар аллақачон мамлакатдан қочиб кетган бўлиши мумкинлигини ҳам истисно қилмаган.