Коронавирус: АҚШда омикрондан илк ўлим, Британияда хавотирли прогнозлар

Жаҳон соғлиқни сақлаш ташкилоти бутун дунё бўйлаб тезкор суръатларда тарқалаётган коронавируснинг янги вариантидан ҳимояланиш мақсадида одамларни яқинлашиб келаётган байрам учун режаларни иложи борича қайта кўриб чиқишга чақирмоқда. 

«Тадбирни бекор қилиш, ҳаётни йўқотишдан кўра афзалроқ. Ҳозир байрамни нишонлаб, кейин қайғуда қолгандан кўра, ҳозир бекор қилиб, кейинроқ нишонлаган маъқул», деди ЖССТ раҳбари Тедрос Адханом Гебрейесус Женевада бўлиб ўтган брифингда.

Унинг сўзларига кўра, янги вариант қолганларига қараганда тезроқ тарқалмоқда ва эмланганлар ҳамда касалликни бошдан ўтказганларга ҳам юқяпти. «Ҳозирги вақтда омикрон дельтага қараганда тезроқ тарқалиши тўғрисида ишончли тасдиқлар бор. Эмланганлар ва касалликни бошдан кечирганлар яна қайта касалланиш эҳтимоли юқори», деди у.

ЖССТ раҳбари жорий йилда Covid-19’дан ўлим кўрсаткичи 2020 йилдаги ОИВ, безгак ва силдан жами ўлим кўрсаткичларидан юқори бўлишини маълум қилди.

АҚШ расмийлари омикрон мамлакатда етакчи вариантга айлангани, умумий соннинг тўртдан уч қисми айнан у билан касалланганини маълум қилди.

Куни кеча Техас штатида омикронни юқтириш натижасида илк ўлим ҳолати қайд этилди.

Жон Ҳопкинс университети сўнгги маълумотларига кўра, пандемия бошидан бери дунёда қарийб 275 миллион ҳолат аниқланди, 5,3 миллиондан ортиқ киши вафот этди.

Душанба куни Украинада омикрон штамми билан илк касалланиш ҳолати қайд этилди.

Теннисчи Рафаэл Надал Абу-Дабидаги турнирдан қайтгач, унда коронавирус аниқланди. Унинг сўзларига кўра, қисман Кувайтда ҳам бўлиб ўтган турнир доирасида барча иштирокчилар ҳар икки кунда тест топширган. Теннисчининг 17 декабрь куни олинган сўнгги тести мусбат натижа берган. Надал мухлисларига мурожаатида барчани ҳозирги қийин даврда ижтимоий масъул бўлишга чақирди.

Европа фонд бозорлари 20 декабрь куни бутун дунё бўйлаб жорий этилган янги чекловларга пасайиш билан реакция қилди.

АҚШ: яқинда реанимацияларда жой бўлмайди

АҚШ бош эпидемиологи ва АҚШ ҳукуматининг илмий маслаҳатчиси Энтони Фаучининг огоҳлантиришича, Рождество саёҳатлари тўлиқ эмланган америкаликлар орасида ҳам омикрон тарқалишининг янги босқичи билан таҳдид қилади.

АҚШда йиллик парвозларнинг катта қисми Рождество ва янги йил даврига тўғри келади.

Фаучининг қайд этишича, омикрон штамми юқори даражада юқумлилиги билан фарқланади ва расмийларнинг эътиборини Европада кўрилаётган чеклов чораларига қаратади.

Яқинда у мамлакат соғлиқни сақлаш тизими яна таҳдид остида қолганини маълум қилди. Унинг сўзларига кўра, АҚШдаги кўплаб касалхоналар реанимация бўлимлари бошқа жиддий касалликлари бўлган беморлар билан тўлган. Коронавирус билан касалланган беморлар оқими яқинда жойлар ва ходимлар етишмаслиги вазияти такрорланиши билан таҳдид қилмоқда.

Ҳозирда АҚШда коронавирус билан касалланиш ҳолатларининг қарийб 3 фоизи – омикрон инфекцияси натижасидир ва уларнинг аксарияти Нью-Йорк штатида аниқланган.

Мамлакатда эмлаш кампанияси ҳукумат кутганидек тезкор суръатда кечмаяпти. АҚШдаги катта ёшдаги аҳолининг қарийб 73 фоизи ҳеч бўлмаганда вакцинанинг битта дозасини олган. Таққослаш учун – Буюк Британияда аҳолининг 70 фоизи тўлиқ эмланган.

АҚШ – пандемиядан энг кўп зарар кўрган мамлакат: касалланганлар 50 миллиондан ортиқ, вафот этганлар — 806,4 минг киши.

Буюк Британияда локдаун: ҳукумат ҳеч нимани истисно қилмаяпти

Буюк Британия ҳукумати коронавирусдан ўлим кўрсаткичи бўйича янги маълумотларни эълон қилди.

Сўнгги суткада 91 743та янги ҳолат қайд этилган; касаллик қайд этилганига 4 ҳафтадан ошган 44 киши вафот этган.

Бу 19 декабрь куни эълон қилинган рақамлар (қарийб 83 минг ҳолат) билан таққослаганда кўпроқ, бироқ 18 декабрь кунги кўрсаткичларга (93 минг ҳолат) қараганда камроқ.

Мамлакатда дўкон ва жамоат транспортида ниқоб тақиш, ижтимоий масофа сақлаш каби чоралар қайта жорий этилган. Бироқ тиббиёт ходимлари бу етарли эмас, деб ҳисоблашмоқда ва ҳукуматни янада қатъийроқ чоралар кўришга чақирмоқда.

20 декабрь куни Буюк Британиядаги ижтимоий тармоқларда ҳукумат 28 декабрдан бошлаб чеклов чораларини жорий этиши мумкинлиги тўғрисида миш-мишлар тарқалди. Гап барча муассасаларни ёпиш билан кечувчи локдаун ҳақида эмас, фақат ресторан ва барлар фаолиятини чеклаш ҳақида кетмоқда.

Ҳукумат 20 декабрь икки соат мобайнида эпидемияга қарши чораларни кучайтириш масаласини муҳокама қилди. Бироқ бош вазир Борис Жонсон ундан кейин ҳеч қандай янги чоралар эълон қилмади. Фақатгина ҳукумат вазиятни синчковлик билан кузатаётгани айтилди.

Даунинг-стрит илмий ходимлари касалхонага ётқизиш кўрсаткичи ўсишининг олдини олишни биринчи ўриндаги вазифа деб аташмоқда. Уларнинг ҳисоб-китобларига кўра, агар кўрсаткич кунига 3 мингга етса, Буюк Британия соғлиқни сақлаш тизими (NHS) таназзулга юз тутиши мумкин.

Буюк Британия ҳукумати ҳузуридаги илмий кенгаш SAGE’нинг ҳисоб-китобларига кўра, ҳозирда Англияда кунлик ўлимнинг минимал даражаси 600 киши, максимал кўрсаткич эса 6 мингга чиқиши мумкин бўлади.

Англия Премьер лигаси расмийлари 20 декабрь куни ўтказиладиган фавқулодда йиғилишда футболчилар ва клублар ходимлари орасида касалланиш кўпайиб кетаётгани сабабли мавсумни келаси йилга қадар тўхтатиб туриш масаласини кўриб чиқди. Ўтган дам олиш кунлари коронавирус авж олгани туфайли Лиганинг ўнта ўйинидан олтитаси бекор қилинди. Йиғилиш якунларига кўра, ўйинларни бекор қилмасликка қарор қилинди.

Расмий статистикага кўра, 18 декабрь куни Буюк Британияда миллиондан ортиқ вакцина қўлланган. Улардан 940 мингтаси бустерлар.

Европада Рождество: чекловлар ва йўқотишлар

Айрим Европа мамлакатлари Буюк Британиядан узоқроқ бўлишга ҳаракат қилмоқда. Франция бир неча кун аввал ҳеч қандай сабабсиз Буюк Британиядан мамлакатга келишни тақиқлади. Тоғ чанғиси курорти эгаларининг айтишича, яна бир мавсумнинг инглизларсиз ўтиши катта иқтисодий йўқотишларга олиб келади, айрим бизнеслар омон қолмаслиги мумкин. Ўртача ҳисоб-китобларга кўра, инглизлар француз тоғ ёнбағирларидаги жами сайёҳларнинг 40 фоизини ташкил қилади.

Яқинда Германия инглизлар учун мамлакатга киришни бутунлай тақиқлади. Германия фуқаролари Буюк Британиядан уйларига қайтиши мумкин, бироқ бунинг учун ПЗР тестининг манфий натижаси ва тўлиқ эмланганлар учун ҳам икки ҳафталик карантин талаб этилади.

Германия расмийлари янги локдаун жорий этмаслик борасида қатъий қарор қабул қилди ва касалланишнинг бешинчи тўлқинини тўхтатиб бўлмаслигини айтди.

Швейцария 20 декабрь куни ҳар йили анъанавий тарзда январь ойи охирида Давосда ўтказиладиган Жаҳон иқтисодий форуми бекор қилинишини эълон қилди.

Швейцария ҳукумати томонидан жорий этилган сўнгги чекловлар орасида уйдан ишлаши мумкин бўлган хизмат ва бизнесларнинг мажбурий равишда масофадан ишлаши ҳам бор. Бар, ресторан, спорт заллари ва бошқа жамоат жойларига қатъий равишда вакцина паспортлари билан кирилади.

Австрия ҳам байрам вақтида мамлакатга киришни чеклашга тайёргарлик кўряпти.

Омикрон тез суръатларда тарқалаётгани учун 19 декабрь куни Нидерландияда қатъий локдаун бошланди. У камида 14 январга қадар давом этади. Бироқ расмийлар муддатни узайтириш томонга қайта кўриб чиқишни истисно қилишмаяпти.

Биринчи эҳтиёж товарлари билан савдо қилмайдиган барча дўконлар, барлар, спорт заллари, сартарошхоналар ёпилди. Уйда иккитадан ортиқ меҳмон кутиб бўлмайди, байрам кунлари эса тўрт кишидан ортиқ меҳмон кутишга рухсат йўқ.

Данияда байрам кунлари биринчи эҳтиёж хизматларини кўрсатмайдиган театр, кинотеатр ва бошқа жамоат жойлари ёпилди.

Ирландияда расмийлар омикрон мамлакатда етакчи штаммга айланганини маълум қилди. Янги касалланиш ҳолатлари бўйича ўтказилган тадқиқотлар ана шу ҳақда. Жорий босқичда ирланд ҳукумати бар ва ресторанлар иш соатини 20:00га қадар чеклашга қарор қилди.

Франция 20 декабрь куни 5 ёшдан 11 ёшгача бўлган болалар учун вакцина олишни тавсия қилди. Мана шу ёшдаги болалар учун фақат Pfizer-Biontech компанияси томонидан ишлаб чиқарилган вакцина сертификатланган.