Эрдўған Зеленский Путин билан Туркияда учрашишга рози бўлганини айтди

Туркия президентининг сўзларига кўра, Анқара Россия ва Украина етакчилари учрашувини ўтказиш имкониятини тақдим этмоқчи.

Фото: Anadolu Agency

Туркия президенти Ражаб Тоййиб Эрдўған Украина раҳбари Владимир Зеленский Туркия ҳудудида Россия президенти Владимир Путин билан учрашишга рози бўлганини айтди.

Эрдўғаннинг сўзларига кўра, Анқара Россия ва Украина етакчилари учрашувини ўтказиш имкониятини тақдим этмоқчи.

"Жаноб Зеленский билан келишувимиз айнан шу йўналишда бўлди", - деди Эрдўған.

"Жаноб Путин билан учрашувимиздан сўнг бизга воситачилик роли берилса, биз бу ишда қатнашамиз ва ўз ҳиссамизни қўшишга умид қиламиз", - деди Туркия президенти.

Россия президенти матбуот котиби Дмитрий Песковнинг билдиришича, Москва ҳар қандай шаклдаги музокараларни, жумладан, Путин ва Зеленскийнинг Туркияда учрашишини рад этмайди, аммо ҳозирча бу масалада ҳеч қандай келишув йўқ.