Тахтиқорача довонида автотранспорт воситаларининг ҳаракати вақтинча тўхтатилди. Бу ҳақда Ички ишлар вазирлиги Йўл ҳаракати хавфсизлиги бош бошқармаси хабар қилмоқда.
Самарқанд ва Қашқадарё вилоятларини боғловчи Тахтиқорача довонида транспорт воситаларининг ҳаракатланиши вақтинча тўхтатилган. Бунга қалин қор ёғаётгани ва ноқулай об-ҳаво сабаб бўлган.
«Самарқанд ва Қашқадарё вилоятларини боғловчи «Тахтиқорача» довонида қалин қор ёғганлиги сабабли, турли кўнгилсиз ҳодисаларнинг олдини олиш мақсадида автотранспорт воситаларининг ҳаракати вақтинча тўхтатилди», - дейилади хабарда.
Эслатиб ўтамиз, бугун 2022 йил 6 феврал куни мазкур довонда кучли қор ёғаётгани хабар қилинганди.
Маълумот учун, Тахтиқорачадан ўтган йўл М39 Олмаота-Тошкент-Термиз халқаро автомобиль йўлининг бир қисми ҳисобланади.
