Қирғизистонда илк миллий автомобилни ишлаб чиқаришни бошлаш ортга сурилди

Қирғизистоннинг Kami Motors автозаводи электр юк автомобилларини белгиланган муддатда ишлаб чиқара олмади.

Фото: kami.kg

Компания сертификатлаштириш жараёнини якунлай олмагани учун машиналарни ишлаб чиқаришнинг имкони бўлмаяпти.

Kami Nimble электр юк автомобиллари ишлаб чиқаришни ўтган йил ноябрда бошлаш режалаштирилган, аммо кейин 2022 йилга сурилганди.

Ҳозирда сертификат синовлари учун бир неча дона автомобил ишлаб чиқарилган.

«Ҳозирда машина Беларусда транспорт воситаси сифатида маъқулланиши учун аттестациядан ўтказилмоқда. Жараён қачон якунланишини айта олмайман», — деди Kami Motors вакили Рискелди Асқаров.

Унинг сўзларига кўра, сертификатлаштириш жараёни пандемия чекловлари ва қиш мавсуми бошлангани сабабли чўзилиб кетган.

Асқаровнинг айтишича, Kami Nimble автомобилларини ишлаб чиқариш бу йил аниқ бошланади. Компания сайтида 2022 йил 31 декабр буюртмачиларга дастлабки 100та машинани етказиб беришнинг охирги муддати сифатида кўрсатилган.

Тайёрлаган: Дилшод Аскаров

#Қирғизистон #электромобил