Тегишли қарорлар билан Тошкент, Сирдарё ва Жиззах вилояти ҳокимликлари тузилмасида янги тайинловлар амалга оширилди.
Тошкент вилояти ҳокимининг қарори билан Мирғозиева Зуҳра Тўраевна –вилоят ҳокими ўринбосари – Оила ва хотин-қизлар бошқармаси бошлиғи вазифасини бажарувчи этиб тайинланди.
З. Мирғозиева 1978 йилда Тошкент вилоятининг Чирчиқ шаҳрида туғилган. Маълумоти олий, 2001 йилда Тошкент Давлат Педагогика университетини тамомлаган. Фаолиятини 1996 йил 76-мактабда ўқитувчи вазифасидан бошлаган. 2009 йилдан 2020 йилга қадар Тошкент вилояти Чирчиқ шаҳар ҳокимлигида турли масъул лавозимларда ишлаган.
Мазкур тайинловгача, З.Мирғозиева Тошкент вилояти ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари лавозимида ишлаб келаётган эди.
Сирдарё вилояти ҳокимининг қарори билан Тожибоева Наргиза Келдибековна вилоят ҳокимининг ўринбосари – Оила ва хотин-қизлар бошқармаси бошлиғи вазифасини бажарувчи этиб тайинланди.
Мазкур тайинловгача, Н.Тожибаева вилоят Маҳалла ва оилани қўллаб-қувватлаш бошқармаси бошлиғининг биринчи ўринбосари вазифасида ишлаб келаётган эди.
Жиззах вилояти ҳокимининг қарори билан Мухторова Назира Абдусатторовна – вилоят ҳокимининг ўринбосари, Оила ва хотин-қизлар бошқармаси бошлиғи вазифасини бажарувчи этиб тайинланди.
Мазкур тайинловгача Н.Мухторова Жиззах вилояти ҳокими ўринбосари – Маҳалла ва оилани қўллаб-қувватлаш бошқармаси бошлиғи лавозимида ишлаб келаётган эди.
