Муҳаммад Юсуфнинг “Танланган асарлар”и Туркияда чоп этилди

Ўзбекистон халқ шоири Муҳаммад Юсуфнинг “Танланган асарлар”и Туркияда нашр этилди. Бу ҳақда Туркиядан Ўзбекистон Ёзувчилар уюшмаси раиси ўринбосари, шоир Нодир Жонузоқ Kun.uz’га хабар берди.

“Халқаро Туркий Маданият Ташкилоти (ТУРКСОЙ) ва Ўзбекистон давлат санъат ва маданият институти жамоаси томонидан турк тилига ўгирилган мазкур китоб тақдимоти шу йилнинг 5 апрель куни Анқара шаҳрида тантанали равишда ўтказилди.

ТУРКСОЙ бош қароргоҳида бўлиб ўтган тақдимот маросимида ҳамюртларимиз – Ўзбекистоннинг Туркиядаги Фавқулодда ва мухтор элчиси Алишер Аъзамхўжаев, Ўзбекистон Ёзувчилар уюшмаси вакиллари, шоирнинг оила аъзолари ва китоб таржимасида қатнашган ижодкорлар жамоаси иштирок этди.

Анжуманда ТУРКСОЙ халқаро ташкилоти бош котиби ўринбосари Билол Чақижи сўзга чиқди, миллий адабиётимизни кенг тарғиб қилиб келаётган туркиялик мутахассислар Режаи Қизилтунч, Вели Саваш Йелок, Йилмаз Ўзқая, Эмине Бакар, Ҳамза Ўзтуркчи каби фидойи олим ва таржимонлар ўзбек адабиёти, хусусан, Муҳаммад Юсуф асарларининг туркий дунёдаги юксак ўрни ҳақида фикрларини билдирди.

Тадбирда Муҳаммад Юсуф ҳаёти ва ижодига бағишланган ҳужжатли фильм ва қўшиқлар янгради. Турли қардош халқлар вакиллари иштирокида ўтган тақдимот маросими чинакам адабиёт ва дўстлик байрамига айланиб кетди.

Ўзбекистонлик ижодкор ва олимлар ТУРКСОЙ халқаро ташкилотига 2008 йилдан то шу кунларга қадар раҳбарлик қилган, кўплаб халқаро лойиҳалар, жумладан, ушбу тақдимот маросимининг муваффақиятли ташкил этилишига катта ҳисса қўшган Дусен Касеинов қабулида бўлиб, ўзбек ижодкорлари номидан самимий миннатдорлик билдирдилар”, – дейилади хабарда.

Маълумот учун, Халқаро Туркий Маданият Ташкилоти – туркий давлатлардан ташкил топган халқаро маданият ташкилоти ҳисобланади. Ташкилотнинг асосий мақсади бу туркий давлатлар ва халқлар орасидаги дўстлик ва ҳамкорликни кучайтиришдир. Бу ҳамкорлик иқтисодий, маданий ва бошқа соҳаларни ўз ичига олади. Ташкилот бош биноси Туркия пойтахти Анқарада жойлашган. Ҳозирги вақтда, ташкилот бош директори қирғизистонлик Султон Раев ҳисобланади. Ташкилот 3 та расмий тилига эга, булар турк, рус ва инглиз тилларидир.