Бир қатор эксклюзив ҳуқуқ ва имтиёзлар бекор қилинади – Президент фармони

«Ҳудудгазтаъминот», «Ўзбекинвест», «Uz-Prista Recycling», «Ўзбекэкспертиза», «Қишлоққурилишлойиҳа» каби ташкилотларнинг монопол ҳуқуқлари тугатилади.

«Тадбиркорлик муҳитини яхшилаш ва хусусий секторни ривожлантириш орқали барқарор иқтисодий ўсиш учун шарт-шароитлар яратиш борасидаги навбатдаги ислоҳотлар тўғрисида»ги президент фармони имзоланди.

Қайд этилишича, қуйидаги ташкилотларга берилган эксклюзив ҳуқуқлар бекор қилинади:

Аҳолига ва ижтимоий объектларга суюлтирилган газ етказиб бериш бўйича «Ҳудудгазтаъминот» АЖнинг эксклюзив ҳуқуқи бекор қилинади (июнь–сентябрь). Шунингдек, маиший газ баллонларини суюлтирилган газ билан тўлдириш ва ташиш хизматларини кўрсатиш соҳасига очиқ танлов ва тендер савдоларида ғалаба қозонган ҳамда лицензияга эга бўлган хусусий сектор субъектлари жалб қилинади;
Ҳайдовчи ва ҳайдовчиликка номзодларнинг транспорт воситасини бошқаришга лаёқатини текшириш учун тиббий кўрикдан ўтказиш билан лицензияси бор хусусий тиббиёт муассасалари ҳам шуғулланишига рухсат берилади (август);
Ишлатилган техник мойларни тўплаш ва қайта ишлашга оид «Uz-Prista Recycling» МЧЖ ҚК эксклюзив ҳуқуқи бекор қилинади (сентябрь–октябрь);
Товарларнинг келиб чиқиши тўғрисида сертификат беришга оид экспертиза фақат «Ўзбекэкспертиза» АЖ томонидан ўтказилиши ҳақидаги норма бекор қилинади (июнь–июль);
Қишлоқ жойларда бош режаларни тузишдаги «Қишлоққурилишлойиҳа» МЧЖнинг эксклюзив ҳуқуқи бекор қилинади (июль–август);
Электр техника ускуналари ва қурилмаларини марказлаштирилган ҳолда харид қилиш бўйича «Энерго РЭС» МЧЖга берилган эксклюзив ҳуқуқ бекор қилинади (июнь);
Пахта маҳсулотлари, қишлоқ хўжалиги уруғларини сертификатлаштириш бўйича «Агросаноат мажмуида хизматлар кўрсатиш маркази» ДУКнинг эксклюзив ҳуқуқи бекор қилинади (2023 йил февраль);
Ҳарбий контингентнинг, солиқчиларнинг мажбурий давлат суғуртаси «Ўзбекинвест» суғурта компанияси томонидан амалга оширилиши ҳақидаги эксклюзив ҳуқуқ бекор қилинади (июнь);
«Биринчи резинотехника заводи» МЧЖнинг қишлоқ хўжалиги ва автомобиль шиналарининг ягона етказиб берувчиси мақомига оид қоида бекор қилинади (июль);
Ўлчаш воситаларини қиёслашдан ўтказиш хизматлари юридик шахсларнинг метрология хизматлари томонидан ҳам амалга оширилишига рухсат берилади.