Қашқадарёнинг айрим ҳудудларида далаларни чигиртка босгани айтилмоқда

Ижтимоий тармоқларда Қашқадарё вилоятининг Деҳқонобод туманида чигиртка тарқалгани ҳақида хабарлар тарқалди. Ҳолат юзасидан Ўсимликлар карантини ва ҳимояси агентлиги ахборот хизмати маълумот берди.

Маълум қилинишича, воқеа жойида Ўсимликлар карантини ва ҳимояси агентлиги Қашқадарё вилояти бошқармаси ҳамда Чигиртка ва тут парвонасига қарши кураш хизмати томонидан ўрганишлар олиб борилган.

Ўрганишда аниқланишича, Ўзбекистонда чигирткаларнинг 200га яқин тури мавжуд. Уларнинг 6-8 тури яйлов ва қишлоқ хўжалик экинларига зарар келтиради. Ижтимоий тармоқларда тарқалган хабарда айтилган чигирткалар маҳаллий ва Марокаш турига оид бўлиб, маҳаллий чигиртка экинларга хавф солмайди. Марокаш чигирткасига қарши мавсумда уйғунлашган ҳимоя чора тадбирлари ўтказиб келинади.

Жумладан, бугунги кунгача Қашқадарё вилоятида 87 980 гектар, шу жумладан Деҳқонобод туманида 16 222 гектар майдонда зарарли чигирткага қарши кураш ишлари олиб борилган.

Ҳозирда мазкур зараркунандаларга қарши кураш бўйича агротехник тадбирлар олиб борилмоқда. Хусусан, ҳудудга 25 та трактор пуркагичлари, 6 та УМО-пуркагичли махсус автомашина, 1 та трицикл жалб этилган бўлиб, шунингдек қўл аппаратлари ёрдамида ҳам зарарсизлантириш жараёнлари давом этмоқда.