НАТО бош котиби Украинадаги уруш йилларга чўзилиши мумкинлигини айтди

НАТО бош котиби Йенс Столтенберг Bild am Sonntag газетасига берган интервюсида Россиянинг Украинага қарши уруши бир неча йил давом этиши мумкинлигини айтди.

«Биз бу уруш бир неча йиллар давом этиши мумкинлигига тайёрланишимиз лозим. Биз Украинани қўллаб-қувватлашни заифлаштирмаслигимиз керак. Ҳатто бу харажатлар юқори бўлса-да — нафақат ҳарбий ёрдам учун, балки энергия ва озиқ-овқат нархлари кўтарилиши туфайли ҳам», — деган НАТО раҳбари.

Столтенберг агар бу урушдан кейин РФ президенти Владимир Путин 2008 йилда Грузияда ва 2014 йилда Қримда бўлгани каби ҳаракат қилишда давом этса, НАТО «анча каттароқ нарх тўлаши»га тўғри келишини қўшимча қилган.

Буюк Британия бош вазири Борис Жонсон ҳам Украинага ташрифидан кейин The Sunday Times учун мақоласида Ғарб давлатлари етакчиларини Украина қўшини ғалаба қозонгунча давом этувчи узоқ чўзиладиган урушга тайёргарлик кўришга чақирганди. Украина Миллий хавфсизлик ва мудофаа кенгаши котиби Олексий Данилов ҳам Украина «уруш тугашидан йироқ» эканини айтганди.