НАТО бош котиби Россияни хавфсизликка бевосита таҳдид деб атади

НАТО бош котиби Йенс Столтенберг Россияни «хавфсизлигимиз учун тўғридан тўғри таҳдид» деб атади. Унинг 29 июнь, чоршанба куни маълум қилишича, Россия бошлаган уруш ўн йилликлардаги «энг катта хавфсизлик инқирози» ва НАТО ўз тарихида дуч келган «энг катта муаммо»дир. Столтенберг НАТОнинг Мадриддаги саммитини «тарихий» деб атади, чунки бу «совуқ урушдан бери жамоавий мудофаанинг энг катта қайта тузилиши»га олиб келади.

Жорий саммитда альянс ўзининг янги стратегик концепциясини тақдим этиши кутилмоқда. «Янги концепциямиз бизни стратегик рақобат даврига олиб боради. Бу альянс Россияни хавфсизлигимиз учун энг муҳим ва тўғридан тўғри таҳдид сифатида қабул қилишини яққол кўрсатиб беради», - деди Столтенберг саммит очилиши олдидан. Илгари альянс Москвани «стратегик ҳамкор» сифатида қабул қилган – 2010 йилдан бошлаб бу альянс концепциясида мустаҳкамланган, дея эслатди бош котиб. «Бу биз Мадридда келишиб оладиган стратегик концепцияда бўлмайди», деди у. 

«Россия НАТО йиллар давомида йўлга қўймоқчи бўлган ҳамкорлик ва мулоқотдан узоқлашди. Улар мулоқот ўрнига қарама-қаршиликни танлади. Биз бундан афсусдамиз, лекин, албатта, бу воқеликка жавоб беришимиз керак. Биз айнан шундай позициядамиз. Тийиб туриш ва мудофаамизни тубдан ўзгартириш билан шуғулланмоқдамиз», деди Столтенберг саммит очилишида. 

Бош котиб НАТО тезкор ҳаракат қилиш кучлари сонини тахминан 40 мингдан 300 минггача оширишини маълум қилди. Бу кучлар Россиянинг Украинага бостириб кириши муносабати билан бир неча ойдан бери шай ҳолатда эди. Столтенбергнинг сўзларига кўра, шарқий қанотни ҳимоя қилиш альянснинг асосий устувор йўналиши ҳисобланади. НАТОнинг Шарқий Европадаги бир нечта ҳарбий гуруҳлари бирданига бригада даражасига қадар кучайтирилади ва ҳар бири бир неча мингдан иборат тактик гуруҳларга айланади, деди Столтенберг.